Бадьёльйывсаяс - Бадьёльские

Информация о пользователе

Привет, Гость! Войдите или зарегистрируйтесь.



Создать форум

ВАСИЛЕЙ

Сообщений 1 страница 2 из 2

1

«Василейлöн» сьыланкывйыс - тайö миян олöм борд...

Кадыд тай, он и тöдлы, визувтö. Быттьö регыд на куим Вась — Гущин, Лодыгин да Чувьюров öтувтчисны да шуисны нуöдны важ Выль во дырйи «Василей» гаж, а со тай ... дас сизимöдысь нин тайö аслыспöлöс ордйысьöмыс нимöдö шылад тэчысьясöс.

Кольöм вося гаж дырйи Марина Дмитриевна Истиховская сцена вывсянь корис «Василейсö» томмöдны. Мед пö нималана нин шылад тэчысьяс кындзи и том композиторъяс видласны ассьыныс вынсö. Гашкö пö, и эстраднöй сьыланкыв на артмас. А татшöмыс ок ёна колö коми йöзыдлы. Торйöн нин томьяслы.

И тавося «Василейыс» збыльысь томмыштiс. Медводз, дерт, Виктор Напалковлöн зiльöмöн. Ставнас сценарийсö вöлi дасьтöма вогöгöрся кытш моз. Тöв, тулыс, гожöм, ар, а сэсся бара тöв да «Василей». Быдса во шылад тэчысь виччысьö тайö гаж-ордйысьöмсö да лача кутö вермöм вылö. «Пелысь мольяс», «Коми сьылан» котыр да Коми Республикаса Юралысь бердын искусство гимназияысь нывзон сяммисны восьтны видзöдысьяслы татшöм виччысьöмыслысь лов шысö.

«Василейлы» сиöм рытсö нуöдiсны Тун (Денис Рассыхаев), Ошлапей (Андрей Третьяков), Месань (Светлана Малькова), Сутшик ( Надежда Быковская) да Вомидз (Анжелика Елфимова). Бурыс да омöльыс вензисны ас костаныс, колö-ö йöзыслы «Василейыо? Тун, Ошлапей да Месань ошкисны гаж дасьтысьясöс, шылад тэчысьясöс, а Сутшик да Вомидз кулитiсны нинöм абунас ноксьöмысь, кадсö пö сöмын колляланныд:

Колантор тай — гажа олöм,
Кынöмыд кö эськö пöт и.
Пöтöн майбырыс и волö,
Медся чöскыд сэки вöтыд!
Ошйысьöны сьылан гажöн,
Код оз сет ни яй, ни йöв.
«Василейтöг» овлiм важöн,
Лöсьыдджык,
кор гöгöр чöв.
Мый  вылö бур йöз вочавидзисны:
«Василейлöн» сьыланкывъяс -
Тайö миян сьöлöм борд.
Наысь шоналöны сывъяс,
Шаньöн-бурöн лоö морт.

Гаж нуöдысьяс сёрнитiсны кывбурöн, кодьясöс налы тэчислöсьöдiс Василий Лодыгин. Буретш тайö рытö нимöдiсны сылысь выль компакт-диск. А Марк Новосёловöс чолöмалiсны олöмас матыстчан тшупöда пасöн. Сылöн мыла сьыланкывьясöн тöдмöдiсны йöзсö Альфия Коротаева, Вера Булышева, Лидия Логинова да мукöд.

Сцена вылын асланыс сьыланöн петкöдчисны дас кыкöн: Койгортысь Марк Новосёлов, Выльгортысь Михаил Оверин, Кулöмдiнысь Василий Гущин, Пожöгысь Михаил Шахов, Визинысь Игорь Пирогов, Кöрткерöсысь Алексей Ген, Одыбысь Зоя Жижева, Шойнатыысь Альберт Ширяев, Сыктывкарысь Лидия Логинова, Любовь Глазырина, Гений да Александр Горчаковьяс. Быдöн вуджöдöма сьöлöм бисö аслас сьыланö да, дерт жö, кутiс вермöмö лача. Сцена вылö ставнысö корисны быдöнлы кывбур сиöмöн. Лидия Логиноваöс тадз нимöдiсны: «Тöдам вöлi: Лида сьылö, но тi шензьö вай, бур йöз: артмö-й, вöлöм, шылад сылöн, гажöдас на миянöс». Бур сиисны и мукöдлы. Шуам: «Михаил Оверин воис — Выльгорт сиктысь бордья лов. Дзик быд во на приза лоис, мен пö нинöм нин оз ков». Либö: «Бара локтiс Новосёлов — Койгорт сиктысь ыджыд морт. Ыджыд жö и сылöн лолыс, сьыланкывйыс сылы — борд!» А сiдзжö: «Oльöксаныс Горчаковыс — шыладын шег ыдждасянь. Мед и жюри юрöн лоис: сiйö веськыд, сiйö шань». Игорь Пироговлысь сьыланкывсö сьылiс сылöн Иван пиыс да, дерт жö, быдтасыслы кывбурсö сиöмаöсь: «Татчö, помнитсьö да, мöдысь локтiс Пирогов Иван. Кыдзи шуис öти тöдысь, сiйö нималас на тан». Любовь Глазыринаöс корисны сцена вылö татшöм кывьясöн: «Тайö нывбабаыс карысь, сiйöс важöн тöдам ми. Кöн Глазырина, сэн саридз, сэнi ытва, сэнi би!» Нимöдiсны и мукöдöс:

«Нöшта тöдчöдам ми тайöс: танi — кодлöн биа лов! Буретш татшöм жö Ширяев, шылад тэчö — нянь оз ков», «Дзоля сиктысь Миша Шахов, но öд ыджыд сылöн сям. Югыд раскöн, гажа ягöн сiйö содас, а оз ям», «Зоя Жижевалöн сьылан содтö «Василейлысь» гор. Сылысь сьылансö кö кылан, сьöлöм шоналö кöть кор», «Эз на öвсьы Гущин Васьö, водзö гижö, абу руй. Татчö локтiс эз öд дасяс: ачыс гажлы восьтiс туй», «Сöвмö комилöн эстрада, быдтö сiйöс Лёшка Ген. Сылы томьяс ёна радöсь. Сiйö налöн сар и ен». Гений Дмитриевич Горчаков, буракö, «Василей» вылын медся олöмаыс. Сы понда, гашкö, и вичмис сылы тайö кывбурыс: «Горчаковыс, код тай Гений, ёна олöма нин морт. Но öд абу сöмын кеньыс, зэв на вылö лэптö борд».

Гажыс юргис куим час да джын, а быттьö öти здукöн. Шылад тэчысьяслы ёна отсасисны йöзкостса инструментöн ворсан «Зарни ёль» котыр, Кулöмдiнысь «Эжваса дзоридзьяс» да искусство колледжысь «Коми сьылан» котырьяс, культура колледжысь «Пелысь мольяс» сьылан да йöктан котыр.

Конкурсас дас кык сьыланкывсьыс жюри медвылö доньялiс Марк Новосёловлысь да Лидия Логиновалысь «Медводдза радейтчöм». Сьылiс сiйöс Россияса МЧС-лöн йöзöс дорйöм да виччысьтöм лоöмторьясысь видзöм кузя главнöй управлениеысь «Пламя» ансамбль. Налы вичмис Гран-при. «Пламя» котырса войтыр ошкисны коми сьыланкывлысь мичлунсö да пöся аттьöалiсны Койгортса шылад тэчысьöс налы эскöмысь. Таöдз пö ми некор на эг сьывлöй коми сьыланкывтö да эг петкöдчылöй татшöм конкурсас.

Михаил Оверинлöн да Лидия Логиновалöн «Oтчыд Илля лунö» сьыланкыв ловтö ыззьöдö, сiдз и окота уськöдчыны йöктыны. Юркарса «Пелысь мольяс» да «Коми сьылан» котырьяс адöй востера восьтiсны сьылансö. Сьыланкывйыс шедöдiс медводдза места.

Мöд местасö жюри вичмöдiс Василий Гущинлы да Василий Лодыгинлы «Ставыс эськö» сьыланкывйысь. Вера Булышевалöн сьылöмыс сырзьöдö сьöлöмтö, син водзад сувтö аслад олöмыд да вöчöмторьясыд.

Лидия Логиноваöс кывзiгöн том мамалан кадöй дум вылö уси. Дас öкмыс арöснад кагатö чужтан, а вежöрыд кычипилöн кодь на. Сöмын кага дорö муслуныс вöчö верстьöджыкöн. Кымын мелi кыв сяммöма аддзыны Лидия Петровна, а шыладыс зэв ёна лöсялö кывьяс дiнас. Коймöд местаыс буретш вичмис том на композитор Лидия Логиновалы.

Алёна Третьякова сьылiс Михаил Шаховлысь да Александра Мишариналысь «Туналöны ыджыд ытва». Ёна ошкисны тайö сьылансö видзöдысьяс да ассьыныс «василейкаяссö» вичмöдiсны буретш Михаил Шаховлöн быдтаслы.

«Том автор» нимпасын медбурöн шуисны Игорь да Елена Пироговъясöс «Баблöн кепысь» сьыланкывйысь. Воöмаöсь Визинысь, а сьылiсны ар даса куим зонка. Пöль-пöчöс нимöдöм, налысь козиньяс пыдди пуктöм да на вöсна тöждысьöм — татшöм сьыланкывйыслöн мöвпыс да, дерт, быдöнлы лои матысса.

Чужан му йылысь сьыланкывъяс пиысь медмичаöн шуисны Любовь Глазыриналысь «Визин дорын». Шылад тэчысьлы отсалiсны «Пелысь мольяс» да «Коми сьылан» котырьяс.

Вежöрö йиджис Альберт Ширяевлöн «Зарни ки» сьыланкывйыс.

Гашкö, батьöс ассьым вывтi ёна пыдди пукта да. Сöмын бур да зiль бать вермас тадзи велöдны. «Эстрада» нимпасын вермис тайö сьыланкывйыс.

Челядьлы медбур сьыланкывйöн шуисны Алексей Генлысь да Зоя Шиликовалысь «Oшкамöшкасö».

Сьылiс Виктория Шевелёва. Синмад шыбитчö нывкаыслöн сямыс да енбиыс. Колö стöчмöдны, мый Кöрткерöсысь Виктория да Пожöгысь Алёна  ёна  воöмаöсь сьöлöм  вылас видзöдысьяслы.

Найö ассьыныс «василейкаяссö» буретш тайö кык нывкаыслы и сетöмаöсь. Но, кыдз шуласны, гортад пö стеныд весиг отсалö. Ас чужанiнас Пожöгса нывкаыд вермис.

Александр Горчаковлöн йöзкостса «Доли-шели» сьыланкыв лои öнiя кадлы медся лöсяланаöн. Культура да искусство колледжьясысь ныв-зон сяммисны восьтны  важ сьыланкывлысь югыдлунсö да сöстöмлунсö.

Зоя Жижевалöн «Гажа Микöлаöн» тöдмöдiс Иван Ларуков. Сьылiс мичаа, збоя, дерт, неуна ыззьыштöма вöлi лолыс. Но мортсö позьö гöгöрвоны — медводдзаысь петiс нималана сьылысьяскöд сцена вылö, эз, майбыр, повзьы.

Гений Горчаковлысь да Анатолий Афанасьевлысь «Менам донаöйсö» сьылiсны зоньяс. Ныв дорö муслун, сiйöс радейтöм да пыдди пуктöм —   нэмсö ставлы матысса да дона. Кывьясыс да шыладыс бура лöсялöмаöсь öтамöдыскöд да, ме чайта, тайö сьыланыс лоö на йöзкостсаöн.

«Василейыс» мунiс дас сизимöдысь нин. Сiдзкö, эм нин та кузя сямыс гажсö дасьтысьяслöн. Но мыйлакö быд татшöм конкурс бöрас кодлыкö деливö овлö. Унаöн шыöдчылöны асланыс дойöн. Шуам, таво быдöнлы вичмöдiсны донасьыс-дона козиньяс, сöмын öти шань да авья коми ань йылысь вунöдiсны. Нинöм эз сетны Зоя Григорьевна Жижевалы, öтнас коли козинтöг, и быттьö некод тайöс эз и казяв. А öд гаж дасьтысьяслы колö вöлi мöвпыштны, медым некодöс эз ло дойдöма. Уна нин сёрни вöлi сьылысьяс йылысь. Кыдзи найöс доньявны? Шуам, Иван Ларуков да Алёна Третьякова Вера Булышевалы да Виктория Пыстиналы паныд кыдз вермасны водзсасьны? Сэсся, вермас-ö жюриöн веськöдлысь пырöдчыны конкурсö? Таво Алек-сандр Горчаков эз ло вермысьöн. А сьыланкывйыс кö адöй бур? Ачыс аслыс Гран-присö сетас? Абу жö тадзтö ладнö... И медбöрти, кор ми кутам нимöдны тшöтш кывбуралысьяссö? Налы öд уна оз и ков. Мед петкöдчыласны иöз водзас, то пö ми танöсь. Мед и налы кöть нин бур кывйыс вичмас.

И век жö тавося «Василейыс» вöлi кыпыд, ловья, том. Бур, мый аттьö шуисны и звукорежиссёрлы да биясöн вöдитчысьлы, и сцена вывсö серпасалысьяслы. Таын Виктор Напалковлöн сямыс бура тыдовтчö. Сöмын тай эзджык быттьö тырмы йöзыслы Керчомьяысь Нина Лодыгиналöн кыпыд гажа сёрниыс да Лидия Логиновалöн шмоньыс. А сэсся ставыс вöлi шань! Кутам виччысьны выль «Василейöс» нин!

Ганна ХОЛОПОВА,
КОМИ МУ

http://www.komipress.ru

0

2

Лучшие песни "Василея" прозвучат в Сыктывкаре

 
Гала-концерт республиканского фестиваля современной коми песни "Василей" состоится на сцене Академического театра драмы имени Виктора Савина 4 марта .

Напомним, на последнем фестивале, который традиционно проходит в Усть-Куломе 13 января, секретарь политсовета регионального исполкома ВПП "Единая Россия" Роман Зенищев и руководитель регионального исполкома партии Андрей Самоделкин предложили провести гала-концерт фестиваля в Сыктывкаре.

Как рассказал "Комиинформу" режиссер мероприятия Виктор Напалков, в программе концерта - лучшие песни "Василея-2010", а также произведения, которые были победителями фестивалей прошлых лет и уже успели стать коми шлягерами. Всего в мероприятии примут участие более 150 артистов, которые исполнят произведения порядка 10 композиторов - постоянных участников "Василея". Например, такие именитые авторы, как Василий Гущин, Василий Чувьюров, Василий Лодыгин, Петр Шучалин, Михаил Оверин, Марк Новоселов, а также молодые композиторы - Алексей Ген, Иван Шахов, Игорь Пирогов. Также в концерте примут участие учащиеся Гимназии искусств при глава Коми, которые совместно с ансамблем "Пелысь мольяс" представят номера-пародии на таких звезд российской эстрады, как Валерий Леонтьев, София Ротару, Лайма Вайкуле и Верка Сердючка.

Кроме того, Виктор Напалков отметил, что, несмотря на то, что это будет концерт, а не конкурс, определенный элемент состязательности все же предусматривается: публика выберет наиболее понравившуюся ей песню с помощью зрительского голосования.

 

http://www.komiinform.ru/news/62935/

0

Создать форум


Создать форум