Бадьёльйывсаяс - Бадьёльские

Информация о пользователе

Привет, Гость! Войдите или зарегистрируйтесь.


Вы здесь » Бадьёльйывсаяс - Бадьёльские » Кулöмдiн. Усть-Кулом. » Эжва йывса асыв


Эжва йывса асыв

Сообщений 31 страница 51 из 51

31

Вердöны чöскыда

   Шоныд да бур кывъяс став сьöлöмсянь шуа Помöсдiн сиктса кулинарияын уджалысьяс йылысь. Восьтöны водза-водз. Став джаджйыс тыр пöсь сёян-пöжасöн. Чöскыдсьыс-чöскыд пöжасыс да сёяныс сылö вомад. Пöжасьысьяс пö локтöны кык час войын, а заведующöйыс 4 час асылын. Кузь лунтырнад уна и мортöс вердöны да юкталöны. Помöсдiнö ёна волывлöны орчча сикт-посёлокъясысь войтыр. Танi могмöдöны водзвыв шыöдчöм серти юбилейяс, чужан лунъяс да мукöдтор пасйысьясöс.
   Сизимöнöсь и эмöсь, а вевъялöны вöчны ставсö. Аттьö таысь ставныслы. Мед водзö чöсмöдласны йöзöс. Кузь нэм да бур шуд киподтуя шань аньяслы, а тайö: Вера Борисовна да Анна Владимировна Уляшеваяс, Татьяна Ивановна да Ольга Алексеевна Игнатоваяс, Нина Павловна Карманова, Анна Егоровна Пашнина да Зинаида Егоровна Дёмина.
   Кулинарияын век сöстöм, шаньöсь да вежавидзысьöсь. Сы вöсна и пыралöны татчö окотапырысь.

Вера ПАШНИНА. Скoрoдум.
Парма гор
21.02.2009

0

32

МИЯНÖС СÖМЫН БÖБЙÖДЛIСНЫ

   Бур лун, «Парма гор». Ме, Кузнеч Вась, Дереваннöйса морт, чужи-быдми тайö сиктас. Районса газетлы 80 во тырöмкöд йитöдын гижа со мый. Районса газет лыдди век. Мыйсö сэнi сöмын эз сöрлыны, пöръявлiсны тадзи и этадзи, нуöдiсны аслыспöлöс коммунистическöй идеология, бöбйöдлiсны ставнымöс.
   Коркö ме гижлi газетö öти статья. Редакторнас вöлi Семён Иванович Безносиков. Сiйö меным веськыда шуис синмö:
   - Тэ эськö зэв мичаа гижан, но гижан сэтшöмторъяс, мый газетö йöзöдны некыдз оз позь. Гижан иделогия боксянь шогмытöма. Тэнсьыд письмöтö кö ме лэдза газетö, менö пуксьöдасны 58-öд статья серти.
   Кадыс вöлi реакционнöй. Москваын власьтъяс дас кык часа уджалан лун пыдди эськö вöчисны 8 часаöс, но мынтысьлiсны уджысь трудоденьясöн. Рочöн кö шуны, мунiс обирательство, быд ногыс вештöдiсны натуральнöй налогъяс. Ставсö, мый быдтылiсны крестьяна муяс вылын, видзлiсны гидын-картаын, нулiсны карö да кытчöкö уджалысь мортлы дон вештытöг. Сувтiн кö гыж мында паныд, мыждывлiсны судъясöн, пуксьöдлiсны колонияö. Вайöда öти пример. Кузöбын тöвнас вöр лэдзигöн вöлi 12 часа уджалан лун. Сергей Володьлöн гын сапöгыс войнас усьöма пач вылö да сотчöма, удж вылас эз вермы петны нёль лун. Морттö судитiсны кыдз саботажникöс 6 тöлысь принуд, нуисны «Ухталагö» да сэнi и «виисны». Со татшöм вöлi сэки «гуманнöй» олöм. А газетса мораль век вöлi ошкана.
   Ме тöдлi зэв одиознöй редактор Н.Пунеговöс. Сыысь лицемернöй мортыс эз вöв. Гижлiс нинöмабусö, сöрис, пöръявлiс да эз гöрдöдлы, эз яндысьлы некодысь. Ме вайлi сылы öти висьт экономическöй законъяс йылысь, а сiйö меным шуис: тэ пö инакомыслящöй. Миян пö öнi тэ кодьястö йöрталöны йöй домö. Тэ пö мунан коммунистическöй идеологиялы да райкомлы паныд. Ме сылы шуи:
   - Пунегов ёрт, этшаджык колö сёйны, кадысь водз кулан, абу мöй яндзим ветлöдлыны рушкутö чургöдöмöн?
   Сiйö ме вылö мöдiс видзöдны бугжыльöн, пöльтчис, лöзöдiс.
   Öнiя газет гижö районын лоöмторъяс - информационнöй пустякъяс. Тырыс реклама да нинöмторъяс. Кöть ог лыддьы, пöльзаыс абу. Аддзысьлытöдз.

Кузнеч Вась.
Парма гор
14.02.2009

0

33

БАДЬЁЛЬЙЫЛÖ ВОЛIСНЫ
Помöсдiнса творчество керкаысь велöдысьяс.
   Чукöртлiсны челядьöс да велöдiсны кысьыны бисерöн, вöчны небыд чачаяс. Аскöдныс вайлiсны ас киöн вöчöмторъяс, лöсьöдлiсны выставка.
   Челядь да бать-мам ыджыд аттьö висьталiсны сиктö волысь Нина Евлогиевна Шевелёвалы, Галина Валерьевна Трофимовалы, Татьяна Леонидовна Игнатовалы да Ирина Николаевна Пыстиналы да сиисны волыны нöшта.
Парма гор
23.04.2009

0

34

НИМАВНЫ УДЖÖН И ГАЖÖН

   Вина юöмлы паныд сулалысь районса комитетлöн заседание вылын сёрнитiсны медсясö курыдторъясöн керкасянь вузасьöм да юысьясöс бурдöдöм йылысь. Кыдзи висьталiс общественнöй безопасносьтлöн милицияса начальник В.А.Юдин, гортсянь вузасьöмысь кольöм воын кыскöма кывкутöмö 23 мортöс, таво нин - нёльöс. Кывйö сетчытöмъяс медунаöсь Керчомъяын (кöкъямысöн), Дереваннöйын (витöн) да Кулöмдiнын (витöн). Медся лёкыс сыын, мый вузасьöны шогмытöм сорасъясöн, мыйысь йöз висьмöны да весиг кулöны. Штрапъяс ичöтöсь: 500-сянь 2 сюрс шайтöдз. Закон торкалысьяслы тайö «ном курччöм» кодь. Видзöдöм серти, некутшöм бур оз вай сiйö, мый вьгль восянь дугöдiсны вузасянiнъяс милицияöн прöверитöм. Тайö юкöнас этша верман вöчны сы вöсна, мый оз петны свидетельяс, а петöны кö, то судын вежöны висьталöмсö.
   Районысь врач-нарколог А.В.Лютоев юöртiс, мый юысьясöс бурдöдöм могысь эм та вылö лöсьöдöм жыр да нёль койка. Юöмöн висьысьяслöн лыд бöръя воясö чинö, шöркодя 5-7 процент вылö. Чинö и юöм помысь кулысьяслöн лыд. Öткымын воö воöдчылiс сизим мортöдз, а кольöм воын кулiс сöмын öти морт.
   Районын абу наркотикöн кольмöдчысь. Волiс öти Выльгортö Эжваысь, но бöр мунiс. Та кузя кык во нин видзöдöны школаясын велöдчысьясöс, наркотик видлысьяс абуöсь.
   Юöмысь пöгибö воöмаясöс бурдöдöны дон босьттöг. 2007 воын бурдöдчис 66, 2008 воын 155 морт. Кулöмдiнысь да сы гöгöрысь, кодъяс лыддисны коланаöн, бурдöдчисны нин ставныс. Колисны ылiджык сиктъяс да посёлокъяс. Oнi мьфдöн бурдöдны оз позь, сöмын ас окота серти.
   Районса сиктъясö да посёлокъясö петалiсны 23-ысь, видзöдлiсны 1050 мортöс. Школаясын да уджалан котыръясын лыддьöны лекцияяс, петкöдлöны видеофильмъяс, лэдзöны стендъяс. Бур сiйö, мый öнi быд школаын эмöсь медицинаса уджалысьяс. Найö тайö делöыслы сiдзжö сетöны ыджыд тöдчанлун.
   Комиссиялöн заседание вылын кывзiсны тайö юкöнын вöчан удж йылысь местаяс вылын администрацияясöн веськöдлысьясöс. Кулöмдiнысь И.В.Попов висьталiс, мый сиктын гортсянь вузасьöны нёльöн. Налöн нимъяс бура тöдсаöсь. Кыкыс олöны милиция керкакöд орччöн, но асланыс мисьтöм уджысь оз öвсьыны. Участкöвöй инспектор тайö юкöнас сиктса администрациякöд öтув оз уджав, ыстысьö кад тырмытом вылö.
   Керчомъяысь Л .Е.Траилина висьталiс, мый кольöм воын гортсянь винаöн вузасьысьяс вылö гижисны 11 протокол да таво нин кыкöс. Уджалöны участкöвöйкöд öтув. Сытöг лёк оласнога семьяясö оз мунны. Во чöжöн дасьтöны олан условиеяс йылысь 80 гижöдöдз. Тöдöны, кодъяс вайöны да вузасьöны лёк сорасъясöн, но абу лöсьöдöма ни öти протокол, сы вöсна мый свидетельöн некод оз пет. Откымынöс штрапуйтöма нин некымынысь, но оз öвсьыны. Любовь Егоровналöн видзöдлас вылö, штрапсö колö содтыны тöдчымöнъя.
   Тайö юкöнын власьтöн, правоохранительнöй органъясöн да общественносьтöн вöчан öтувъя уджлöн коланлун йылысь сёрнитiс районса администрацияöн веськöдлысьöс вежысь Н.А. Левченко. Сiйö тöдчöдiс, мый тайö уджас колö öтувъя туйвизь.
   Кывкöртiс районса юралысь С.П. Каплин, проблема вылас видзöдлiс паськыдджыка. Сiйö шуис, мый гортсянь вузасьöмкöд водзсасьöм - тайö вина юöмлы паныд тыш нуöдöмлöн кутшöмкö да юкöн. Вина юöмкöд тыш колö нуöдны комплекснöя, став майшöдланасö артыштöмöн да ставлы öтвылысь. Лёк сiйö, мый абу пыдди пуктана статистика. Нöшта лёкджык сiйö, мый тайö юкöнас абуöсь чорыд законъяс. Кодъяслыкö тайö кивыв. Кодъяслыкö зэв колö, мед татшöмторйыс кыссис водзö. Торйöн нин бура колö видзöдны сы бöрся, мед курыдторъяс эз веськавны, эз вузавны найöс тыр арлыдтöм челядьлы. «Некод оз лок районö да котырт вина юöмлы паныд тыш. Ставсö ыджыд кывкутöмöн колö вöчны аслыным», - тöдчöдiс юралысь.
   Кыв шутöг, вина юöм паськалiс ёна. И быдöн тöдö, мыйла: уналы мичаа олöм вылö эз ло ни экономическöй, ни нравственнöй подув. Кор мортлöн абу удж, сiйö лэдзчысьö, олö ылöсас, кыдз правилö, сетчö юöмö. А миян районын уджтöмалöмыс, позьö кö тадзи шуны, вужъясьöмöн вужъясис. Мыжаыс абу районса, а вылыс тшупöда власьт, государство, кодi уджтöмалöмсö вöчис олöмлöн нормаöн. США-сянь «гыыштöм» кризискöд йитöдын öнi уджтöмалысьö гижöны уджöн могмöдан шöринö любöй матыстчысьöс. Öти боксянь кö, гашкö и бур: дорйöны тшыгла кулöмысь. Но, мöдар боксянь кö, вывтi лёк. Морт велалö овны «дарöвöй», уджавтöг воысь сьöм вылö да сiйöс водзö вылö прамöй удж вылö он кыпöд. Олас макарон да нянь вылын, а удж вылö оз пет. Сiдз шусяна общественнöй уджъясыд, кор коллялöны сöмын лунсö, рочöн кö iуны - ерунда. Государство неуна бергöдчыштiс ас делö котыртысьяслань, вичмöдö вель уна сьöм, но босьтчысьыс лыда. Дыр уджтöмалöм вöсна йöзлöн кöсйöмыс дзикöдз бырис, он «бордйöд» и дас воöн.
   Видзöдлыны кö мортлöн лов боксянь, асьныд аддзанныд, мый петкöдлö телевидение, мый гижöны сiдз шусяна «виж» газетъяс да журналъяс. Кыдзи овны, кутiсны велöдны дасысь верöс сайö петавлöм «певичкаяс» да кок вож костнаныс нажöвитчысьяс. Телевидениелöн геройясöн лоисны дас кык да дас куим арöсöн кага вайысьяс, ассьыныс кагаяснысö мырдöналысьяс да мукöд омöльяс. Öнi таысь он дзебсьы, пырö синмö да пельö оз сöмын казьтыштöм нин радио да телевидение, газет да журнал, но и медся ыджыд «лöкань» - интернет пыр. Омöльсö морт «юö» промокашка моз да, оз и тöдлы, ачыс «пырö гуö».
   Кытчöдз государстволöн оз ло аслас гражданалы пыдди пуктана удж да судзсяна удждон, кытчöдз примерöн оз ло бур оласног, сэтчöдз и кыссяс ылöсас олöм, тшöтш и вина юöм. Но тайö оз висьтав сы йылысь, мый нинöм оз ков ли оз позь вöчны места вылын, торйöн кö, миян районын. Унатор позьö вöчны и вермана вöчны. Лыддьöдла сiйöс, мый тöдöны ставöн, но кодi та вöсна кывкутö, колана ногöн оз вöч. Юöны, торйöн нин том йöз, оз сöмын сы вöсна, мый абу удж, а сы вöсна, мый абу котыртöма прöст кад. Унатор на оз вöчсьы культура да спорт юкöнъясын. Öтипöлöс ыстысьöм - абу сьöм.
Менам видзöдлас вылö, зэв ыджыд öшыбкаöн лоис челядьöс вермана уджысь дугöдöм: школаяс дугдiсны вöдитны ас град йöр, котыртны турун пуктöм да с.в. А век на главнöй воспитайтысьöн вöлi удж. «Тöв чужъялысьысь» бур морт некор на эз петлы.
   Таво кутам овны «тшöтшöдöм» бюджетöн. Программаяс, кодъясöс вöлi артыштöма сы вылö, медым бурлань вежсис йöзлöн оласног, тырвыйö оз збыльмыны. Ми гöгöрвоам, и районса юралысь С.П.Каплин сувтöдö мог, медым и водзö нималiм уджöн да гажöн, а эг вина юöмöн. Сiдз кö нин шуны, öнiя зэв сьöкыд условиеясын район кутчысьö асьсö пыдди пуктöмöн. Кольöм воын серти содiс и вöр лэдзöм, и видз-му прöдукция вöчöм. Бурланьö вежсьöмъяс эмöсь и социальнöй юкöнын. Абу нин мöдбöръяöсь удждон серти, кыдзи вöлi кык во сайын.
   Кризис - кризисöн, а унатор, на лыдын и садь оласног - ас сайын. Шулöмаöсь тай: мырдöн вомад некод оз кисьтав. Бур вылö лача эм сы вöсна, мый район, ставнас кö босьтны, дзоньвидза, «ракöн» оз вись, и Эжва йывлы водзö вылö унатор на лоö вын серти.

Василий ЛОДЫГИН.
Парма гор
25.04.2009

0

35

Василий Лодыгин:
"Районын абу наркотикöн кольмöдчысь."
   - Наркотикнад дурöны кыз сьöм кульысьяс. Миян районсалы сэтшöмыд оз шед. Сöдзкö, кöть кутшöмкö, а буртор эм сыын, мый гöля ми олам.

"гортсянь вузасьöмысь кольöм воын кыскöма кывкутöмö 23 мортöс, таво нин - нёльöс. Кывйö сетчытöмъяс медунаöсь Керчомъяын (кöкъямысöн), Дереваннöйын (витöн) да Кулöмдiнын (витöн)."
   - Бöръя бöрйысьöмъяс водзын Бадьёльйылö волiс Помöсдiнса глава Ужицкий А.И.. Öти нывбаба ёна шуасьыс: мыйла он дугöдöй гортсянь винаöн вузасьöмсö? Глава кутöс ыстысьны милиция вылö. Участкöвöй эз жö нинöм кут босьтны ас вылас - бергöдыс главалы да йöз вылö: "Примитöй решение, гижöй заявление, ..." Öта-мöд вылö индалöмОн, шуасьöмöн, ставыс и помасис.
   Но медъёна менö чуймöдiс участкöвöйлöн кывъясыс: "Татшöмъястö, гортсянь винаöн вузасьысьястö, - Енмыс всё равно накажитас". Милициялöн весиг ас вылныс надеяыс абу нин.

"Менам видзöдлас вылö, зэв ыджыд öшыбкаöн лоис челядьöс вермана уджысь дугöдöм: школаяс дугдiсны вöдитны ас град йöр, котыртны турун пуктöм да с.в. А век на главнöй воспитайтысьöн вöлi удж. «Тöв чужъялысьысь» бур морт некор на эз петлы."
   - ТайО збыльтор Василий Григорьевич гижöма. Водзын совхозъясын ёна вöлi уджалöны челядьыд. Öнi - ставыс быри. Но öд весиг мукöд бать-мамыс челядьсö гортаныс оз уджöдны и паныд мунöны школаын уджалöмысь (Помöсдiнын, Пожöгын) - прынцъясöс да прынцессаясöс быдтöны. Кöсйöны буракö, мед найö быдмисны да киновывсаяс моз уджавтöг куш гöгйöн чивкъялiсны олöм чöжыс.
   И прокуратура тшöтш видзöдö, мед челядь эз уджавны-мырсьыны, мед кадыс унджык налöн вöлi вина юны, шпуткыны, "чижикасьны" 12 арöссянь. Но кымын ёнджык прокурор "видзас" челядьöс уджысь, сымын унджык аслыс уджыс ("делöясыс") содас, кор татшöм уджавтöм челядьыд быдмасны да кутасны юны-куритчыны, пасьйыны-жуглыны, вартны-вийны.

"Кольöм воын серти содiс и вöр лэдзöм, и видз-му прöдукция вöчöм."
   - Ог тöд кыдзи вöр лэдзöмын, а " видз-му прöдукция вöчöм" сöвмöм йылысь сöрöмыс менö скöрмöдны нин кутiс. Колöкö Кулöмдiнса МТС-ын "содiс видз-му прöдукция вöчöм"? - Вермас лоны. Ог куж нинöм та йылысь шуны.
   Гашкö Пожöг да Помöсдiнса СПК-ясын друг ставс бурмис? - Öдвакö... "Помоздино" СПК-ын мöс стадаыс век на чинö. Кольöм во дорысь тавося куим тöлысьöн (квартал) лысьтöма 15 тоннаöн этшаджык. Кукань видзысьяслöн мукöд группаас "отвес" нин мунö. Хлебозавод кутлiсны"реконструируйтны" вый вöчанiнö  да сiйö уджыс весиг дудiс. Вермас лоны, оз нин сэсся уджыс водзö мунлы тайö "техническОй перевооружениеад".
  Вермас лоны гортса овмОсъсын мöсъясыс нöкйöн кутiсны лысьтыны? - Кыдзи ме ас гöгöр аддза, мый тöда - ас овмöсын мöс лыд чинО (3-5 пОв унджык). И картупель муяс сiдз жö эндöны. Но миян газет-радиоын власьтыд векöтарö ошйысьöны: йöв-яй вузалöм содö и содö.
   И делöыс öд сiын, мый тайö збыль и найö оз ылöдчыны. А кыдз-сiдз вермас лоны, мый скöт лыдыс чинö, а "йöв-яй вузалöм содö"?!
   Мöс лыдыс кö чинö и кукань лыдыс (вайöм-быдтöмыс) сiдз жö чинö. Сiдзкö, и кукань яй вузаломыс чинö. Но мöсъястö сиктса йöз бырöдöны - яй вылö начкöны. - СОДÖ МÖС ЯЙ ВУЗАЛÖМ, а оз кукань яй вузалöм (кыдз позьö гöгöрвоны СМИ-ын ошйысьöмысь).
   Сiдз жö и "йöв вузалöмкöд": СОДÖ ЙÖВ ВУЗАЛÖМ, а оз йöв лысьтöм! Лысьтан мöсъяс сиктса йöз начкалöны, сiдзкö, и йöлыс чинö. А кыдзи вермас лоны: этшаджык лысьтöны, а вузалöны - унджык?
   Водзын сиктса ань ас мöс лысьтöм йöвсьыс мыйттакö ас гортсаяслы кольöдлiс, мыйттакö рöдвужсаяслы вичмöдыштлiс, этшаник суседъясыслы да тöдсаяслы вузыштлiс; тырмывлiс и посни куканьлы, порсь пиянлы. А öнi, кор восьталiсны "йöв босьтанiнъяс" (приемнöй пункт), содыштiс государствосянь дотация, - миян аньыд кутiс УНДЖЫК ВУЗАВНЫ йöвтö. А вот асьныс - ЁНА ЭТШАДЖЫК кутiсны йöвтö СЁЙНЫ. Рöдвужлы, суседъяслы, порсь-куканьлы - нинöм нин оз чуктi. Вот мыйын делöыс! Вот мыйла лысьтöмыс - чинö, а вузалöмыс - содö!
   Дерт, бур, мый верман аслад уджысь содтöд сьöм босьтны, но, збыль выласкö, тайö - асьтö ылöдлöм. Рöдвуж-суседыдлыкö йöвтö он вичмöд, сiдзкö, турунтö пуктыны отсасьнытö мортöс медавны ковмас сьöм вылО. Куканьтöкö йöвнад он верд, бара жö, кутшöмкö нур колö. И турунтö тöв кежлö вайныд - техника колö. Водзынкö, совхоз-колхозын позьö вöлi трактор-машина донтöмысь корлыны: "заправитын" тракторсö и трактористсö (штоп путiн) - туруныд пöгибысь воас йöрöдзыд; öнi - донъясыс "курччасьöны", да и тракторсö аддзынына колö . Ме шуа тiянлы: таво "йöв-яй вузалöмыд" - гöтшöбöн лапкыштас-чинас. Ошйысьныд - нинöмöн нин лоö.
   Бать серавлывлас: воздын "Ленин туйöд" газетö кодкö гижöма: визд-му овмöс пö - "сöвмö-йывмö". Журналистыс бура ко гöгöрвоö "йывмö" кывсö кыдзи "йывлань кыптöм", "подъем". Збыльвыласкö, "йывмыны" - чинны, бырны: ("Ыжъясыс гидас оз овны - йывмОны".)
   Сiдз и миян öнiя видз-му овмöс "сöвмö-йывмö". - Кодi кодарсянь видзöдö. Кодi мый кöсйö аддзыны.

0

36

МОРТÖС АДДЗИСНЫ «ЖДИ МЕНЯ» ПЕРЕДАЧА ОТСÖГÖН

   «Нöшта öти мортöс корсисны да вайисны Дагестанысь. Тайö Валерий Шабазов». Тайöс кылöм бöрын Надежда Николаевна Шабазовалöн кокъясыс лигышмунiсны. Некодöс эз кыв ни аддзы. Весиг оз помнит, кыдзи уськöдчис пиыслы воча. Но векжö эз вунöд, шудысла бöрдöмсорöн аттьöалiс «Жди меня» передача нуöдысьяс Игорь Квашаöс да Мария Шукшинаöс. Но сёрнитны эз вермы.
   Тайö вöлi март 17 лунö Москваын. А öд вöлi кад, кор уголовнöй розысклöн юкöнысь уполномоченнöй Олег Александрович Морохин шыöдчис Москваса нималана Петровка, 38-ö да волiс юöр: «Ни ловъя, ни кулöмаяс лыдын абу. Абу и бурдöдчанiнын да моргын». Ань сэки эз тöд, кыдзи овны водзö, но сьöлöмнас кылiс - пиыс ловъя, колö корсьысьны.
   Надежда Николаевна Шабазова (ныв дырйи Кочанова) Валерий пиыскöд локтiс чужанiнö 2004 воын Украинаысь. Пиыс пырис уджавны «Гросс» котырö, кöнi вештiсны этша. Дагестанса öти олысь ышöдiс ветлыны нажöвитчöм могысь Москваö да ачыс и нуис. Надежда Николаевна öлöдiс мунöмысь, но пиыс эз кывзы, кöсйис нажöвитчыны, мед дзоньтавны пöль-пöчлысь керка да овны тыр-бура.
   Веськалiсны Москва дорса Красногорск карö. Колiс кыпöдны уна судтаа керка Сернитчис уджавны тöлысь. Кад кольöм бöрын мöвпыштiс локны гортас бöр, но уджöдысь сьöм эз сет. Москваын мунiс Ленинградса вокзал вылö. Буретш чукöртiсны Москва дорса карö уджалан бригада. Воштысьны вöлi некытчö, колiс бöр локтöм вылö сьöм.
   Уджалiгöн олiсны гаражын, кöнi видзисны картупель. Сiйöс и вузавлiсны керкаысь керкаö, патераысь патераö ветлöдлöмöн. Бригада котыртысь уджалысьясöс морт туйö эз пукты. Лёка кö инасис картупель, нöйтлiс. Вердлiс «бич пакетса» сёянöн, корсюрö ньöблiс водка. Бур, мый вöлi картупель. Танi сьöм эз жö сетны, зон бара мунiс Ленинградса вокзал вылö. Вöзйисны мунны Дагестанö кирпич вöчан заводö. Чукöрмисны куимöн. На пиысь öти вöлi Воркутаысь. 2007 вося апрельын воисны Махачкалаö. Сёрнитчисны уджавны сентябрсянь декабрöдз. Удж вöлi сьöкыд, а удждон ичöт - тöлысьöн 2-3 сюрс шайт. Уджöдiсны квайт час асывсянь öкмыс час рытöдз. Вердiсны омöля, яя сёян эз вöв. Олiсны вагонъясын. Веськöдлысь пгуис, мый нажöтка сетас сöмын сезон помын. Августын öти водз асылö зон босьтiс да и мунiс. Ачыс эз тöд кыттчö. Воча лоис сэтчöс морт. Воисны сёрниö, корис уджавны ас дорас, кыпöдны керка Овмöдiс гожся пусянiнö, вердiс бура. Кöсйис вештыны, но ылöдлiс. Куим тöлысь да джын мысти сы дорысь мунiс. Тöдмасис том морткöд да мунiс сы дорö, отсалiс нуöдны гортса овмöс. Вердiс бура. Но локтiсны ёртъясыс да сiйö Валерийöс вузалiс налы. Нуисны уджавны кирпич вöчан заводö. Танi кык тöлысь вöлi быттьö тюрмаын. Oтлаын уджалысь гусьöникöн звöнитлiс кирпич вöчан мöд заводöн веськöдлысьлы, мый окотитöны уджавны сы дорын. Локтiс öд да гусьöникöн пышйисны. Тайö вöлi 2008 вося февральын. Уджалiсны Махачкала дорса Чапаевка сиктын. Видзисны бура, вöлi весиг телевизор, но колiс луннас уджавны 15 час. Гижлiс мамыслы письмö. Юöртiс, мый сьöм нажöвитас да локтас, а колiс уджавны октябрöдз. И öд кöзяиныс вештiс 21 сюрс 500 шайт да пуксьöдiс весиг автобус вьглö. Воис Москваöдз. Ньöбасис, пасьтасис. Босьтiс и сотöвöй телефон. Пукалiс вокзал дорын. Вöлi пемыд нин. Матыстчисны кыкöн, синмас резiсны мыйöнкö да грабитiсны.
   Вöчны нинöм. Бара мунiс Ленинградса вокзал вылö. Вöзйисны уджавны стройка вылын тöлысьнас 500 евро вештöмöн. Уджалiс тöлысь да джын, а удждон эз сетны. Бара мунiс Ленинградса вокзал вылö. Сэнi бара вöзйисны кирпич вöчан Дагестанса завод, кöнi уджавлiс нин. Олiсны общежитиеын. Уджалiс куим тöлысь. Гижлiс мамыслы письмö. Сэтчö пасйис öтлаын уджалысьлысь телефон номерсö. А мамыс шыöдчылiс нин «Жди меня» передачаö да юöртiс, мый пиыс Дагестанын. Махачкалаысь и сюрис.
   - Отсалiс Кулöмдiнысь Сергей Остряков. Пи йылысь став юöрсö да снимоксö мöдöдiс «Жди меня» передачалöн сайтö. Кык во да джын, кор пиöй «корсис бур олöм», вöлiны зэв кузьöн, - синва доршасьöмöн висьталiс ань.
   Кор аньöс корисны Москваö, мунiс кöлуй тыра ыджыд сумкаöн. Овмöдiсны Останкиноса гостиницаын. Сыкöд овмöдiсны и Анголаысь Анжеликаöс, кодi корсис батьсö. Oти лун да мöд. Аньöс эз корны. Эз висьтавны нинöм и пи йылысь. Кадыс быттьö сувтiс. Корисны коймöд лунас, но бара ни öти кыв пи йылысь. Кор залын пукалiгöн нин юöртiсны пи йывсьыс, слабитiс дзикöдз. Кор Мария Шукшина матыстiс микрофон, вошлiс гöлöсыс, но аттьöавны вермис. Март 19 лунö мама-пиа воисны Кулöмдiнö. Поезд вылö билетъяс ньöбис «Жди меня» передача. Oнi Валерий ёнмöдчö дона да радейтана мамöн пуöм сёянöн, пырöдчö лöнь олöмö. Надежда Николаевна писö, кöть сылы и комын сайö нин арöс, сэсся дiнсьыс некытчö лэдзны оз кöсйы. Сiйö и колис, öд Украинаын неминучаын пöгибнитiс нылыс, а верöсыскöд торйöдчисны.
   -  Бур олöм оз ков корсьны кыськö, удж сюрас и ас республикаын. Унаöн ветлöдлöны уджавны бокö. Унаöс жö и бöбйöдлöны. Мунтöдз шыöдчöй налöгöвöй службаö, юалöй, эм-ö сiйö предприятиеыс либö организацияыс сiйö сиктас либö карас, кытчö мöдöдчанныд, вештасны-ö удждон? Oнi интернет пыр позьö тöдмавны ставсö. Ме ог кöсйы, мед миян семьяын лоöмтор суис нöшта кодöскö, - йöз вöсна тöжда нин вöлi Надежда Николаевна.

Марина ДАДАШОВА.
Парма гор
25.04.2009

0

37

СИКТ ЙЫЛЫСЬ КНИГА

   Районса библиотекаясын уджалысьяс пöвстын мунiс ассьыныс грездъяс, сиктъяс да посёлокъяс йылысь медбур удж дасьтöм кузя конкурс.
   Медводдза места босьтiс Бадьёльйыв сиктса библиотекаöн веськöдлысь Нина Афанасьевна Уляшёва. Сiйö дасьтiс гижöдъясöн, фотографияясöн да серпасъясöн аслас сикт йылысь быдса книга-альбом. Кыдзи висьталiс ачыс, материалъяс чукöртiс дас во, лöсьöдöм вылö мунiс нöшта öти во.
   Уджыс зэв корсьысяна, исследовательскöй. Пример вылö, тöдмалöма да серпасалöма быд семьялысь рöдвуж пассö. Пыртöма сиктсалысь творчествосö, йöзöдöма Б.В.Уляшевлысь историческöй очерксö. Танi жö Бадьёльйыв вужъя асшöр композитор Ирина Чувьюрова йылысь гижöд, поэт Виктор Кушмановлöн фронтöвикъяс - Уляшевъяс йылысь очерк да поэма гижöм кузя пасйöд да с.в. Сиктлöн важ олöм йылысь гижöдö мыйсюрö босьтöма учёнöй С.И. Сергельлöн «В зырянском крае» книгаысь. Тайö мортыс ас кадö волiс Бадьёльйылö да вöчис сэкся олöм йылысь пасйöдъяс.
   Öти кывйöн кö, Н.А. Уляшева вöчöма зэв тöдчана удж, мыйысь и вичмис козин. Книгасö корисны Российскöй Федерациялöн тшупöда Сыктывкарса финн-йöгра шöринö, медым тöдмöдны и республикаса войтырöс.
   Колö пасйыны и сiйöс, мый Нина Афанасьевна пыр выльторъяс пыртö и йöзкöд быдлунъя уджö, чуйдö налы интереснöйторъяс. Овлöны лыддьысьöмъяс, книгалы сиöм чукöртчылöмъяс, чужан му туялан гижöдъясöн тöдмöдöмъяс да с.в. Öти кывйöн кö, уджыс ошкана, пыдди пуктана.

Василий ГАБОВ.
Парма гор
28.04.2009

0

38

Шуласны: «Мортöс мичмöдö удж». Тайö кывъясыс Скöрöдумысь Иван Кириллович Пашнин йылысь. Руль сайын 39 во.
   Эз шыблась öтаро-мöдарö, век зiлис видз-му овмöсын. Первой «Помоздинскöй» совхозын, сэсся - Помöсдiнса кооперативын. 19 во сайын босьтлiс выль КамАЗ, кодi уджалö и талун. Кöть пенсия вылын, позьö шойччыны, но уджтöг овны оз вермы. Абу сiйö ки кресталöмöн пукалысь да телевизор видзöдысь. Кöрым заптан кадö котродлö силос вылö веж масса. Весиг дöзмылö, кор техника жугалöм вöсна ытшкыны оз вермыны да уджыс джöмдылö.
   - Кор делöыс мунö, сэк луннас ваям 60 тоннаöдз, - висьталiс И.К. Пашнин.- Весиг сьöлöм вылын долыд.

Александр ШЕБЫРЕВ.
Авторлöн снимок вылын:
И.К.Пашнин аслас матö 20 вося машина дорын.

увеличить

0

39

ПЛАН ВЕВТЫРТIСНЫ

   «Помöсдiн» видз-му овмöс кооператив вевтыртiс турун заптан план.
   1100 тонна пыдди вöчисны нин 1130-öс. Отсалiс райадминистрацияöн вичмöдöм техника. Кöрым заптöмысь эз на дугдыны, турун пуктöм мунö водзö.

Парма гор
15.08.2009



________________________________________

   Талун кежлö - 1 300 тонна турун да 1200 тонна силос. Турунтö поводдяыс оз нин сет, кöнкö, пуктыны; колö содтöд 800 тонна силоссö сюйны. Но техника ена жугласьö – водзö уджыс оз мун. Выль ытшкан вайлiсны да омöля жö отсасьö. Но вочасöн тiлясны. Мöсъяслы тöвйымöн лоö

увеличить

0

40

ЛОИС ВЕВТ УЛЫН

   Неважöн Помöсдінö вoлic республикаса юралысь Владимир Торлопов. Уна объектъяс лыдысь ciйö видзöдліс и вый вöчан завод, кодöс вель
дыр нин тільöны-лöсьöдöны сельполöн вöвлöм нянь пöжалан завод местаö. Ньöжйöник, корсюрö дзуртöмöн, но делöыс век жö мунö. Первой тшупöдын проект серти коліс вежны йирк-вевт. Стрöитчысьяс кöсйисны помавны тайö уджсö июль 31 лун кежлö да кывнысö кутісны. Вый вöчан завод талун вевт улын. Но тайö - сомын медводдза воськов. Уджыс юрвывтыр на. Ставыс сьöм сайын. Мастерлон кывъяс серти, строитчан бригадалы (уджалöны тшöтш помöсдінсаяс) öні ковмас сувтыштлыны. Квайт мортлöн уджыс орас.
   Кыв шутöг, заводсö колö помавны. Кыдз позьö öдйöджык. Сійö колö оз сöмын Помöсдін вожлы, а дзоньнас районлы. Да и республикалы. Уджавны босьтчöм бöрын сійö вермас могмöдны йöв прöдукцияöн Сосногорскöс, Мылдінöс, Кебанъёль дорын кыпалысь ыджыд предприятиеöс да с.в. Республикаса юралысь веськыда шуис: сёян-юан колö медводз дасьтыны ас вынъясöн, местаяс вылын. Нинöм вайны бокиысь сійöс, мый позьö вöчны тані. Вый вочан завод - Эжва йывса крестьянинлы водзö вьлö зэв ыджьд ышöданатор.
   - Выль завод восьтöмöн воссясны бур позянлунъяс унджык да бурджык прöдукция вöчöм вылö, - шуис Помöсдінса видз-му овмöс кооперативöн веськöдлысь В.А. Рогожнииков. - Буртö кутасны босьтны öнія кировсалысь моз. А кировсаыс пö мед тані эз вöв, шуис республикаса юралысь. Та вöсна кутам лача, мый район да республика отсаласны объектсö вайöдны помöдз.

Александр ШЕБЫРЕВ.
ПАРМА ГОР
15.08.09

увеличить

0

41

Александр ШЕБЫРЕВ:
"Ставыс сьöм сайын. Мастерлöн кывъяс серти, стрöитчан бригадалы (уджалöны тшöтш помöсдінсаяс) öні ковмас сувтыштлыны. Квайт мортлöн уджыс орас."

   - "Сувтлыштic" нин уджыс май тöлысьын, кор маслозавод кыпöдысь ООО "Северспецпоставка" мöдöдiс приказ: йöзыс мед гижасны заявление отпускö, кодi оз кöсйы - мед уволитчöны. Сэсся недыр кад мысти друг локтiсны УКС-ысь (Управление капитального строительства) морт: колö пö водзö уджавны - сьöм лоö.
   Сьöм Минсельхозпрод мöдöдiс - вевт помалiсны. И друг, нем виччысьтöг, быттьö кöсысьöма, ачыс Коми миян Республикаöн Юралысь аслас став шоблöнас гузьгысисны-воисны кыськö уна машинаöн. Кытшовтiсны "объекттö", видзöдалiсны, телекамера водзын вежнясьыштiсны... Сэн жö орччöн кыськö лои и ачыс Балакин Д.М., медыджыд маслозавод кыпöдысь, ООО "Северспецпоставкалöн"  Генеральнöй директор. ... Кытшлалыштiсны "объект" гöгöр, сöлiсны машинаясö и вошины син сайысь. Мойдын моз: кыськö вувзьысьлiсны и ... абуöсь нин.
   Ну, волiсны, слабог. И мый сэсся водзö? - А мый эсько тi виччысянныд?!
   Тайö уна йöз волöм бöрад, öнi стрöйка вылын шы ни тöв. Öшинь-öдзöс тувъявлöма. Весиг стöрöж абу. Некод оз косйы уджонтöг уджавны.
   Кор юнь тöлысьнад сьöмтö вуджöдлiсны, сэк и уджалысьяслы вештысьыштiсны воддза уджсьыс - пон пай шыбитыштiсны. А мый юль тöлысьын уджалiсны, сiйö ...
   Да и енмыс тöдö, кыдзи татчöс уджалысь йöзсö оформитöмаöсь Ухтаса "Северспецпоставкаад". Приказ ни "трудöвöй договор" йöзыс эз аддзывлыны. - Код тöдас, лыддьысьöны оз помöсдiнса стрöительясыс тайö предприятие вылас.

   Дерт жö тайö стрöйкалы май тöлысьо нин пом воис. - "Кризис" пö конкö шодлö мир туй вылвтi.
   А мыйла (и кытысь!) сiдзкö сьöмсö "аддзисны"? - вевт помавны?! либö Торлоповлы мичаджыка петкöдчöм вылö?! (Средства, выделенные по статье бюджета "Дополнительные меры по повышению комфортабельности проезда Главы РК по Усть-Куломскому району"?)

  Тайö стрöйбаыс, збыль вылö кö, некодлы оз ков. Чина йöзлы (власьтлы, Минсельхозпродлы) öнi жаль сьöмтö сетны. Да и ноксинысö дыш.
   ООО "Северспецпоставкалы" ёна оз жö ков. Деньгасö тай курыштiсны-а.
   "Помоздино" СПК-лöн öнi кежлö эм маслозаводыc. Водзын кооператив кыкысь нин тайö проект вылас (сельпо хлебозаводысь совхоз маслозавод вöчны) чукöртлiс докуметация, вöчлiс "технико-экономическöй обоснование"; лосьöдлiс, гижалiс, кырмöдалiс,  ... Коймöдысь сo эськö и вевт улöдз нин воис, да, видзöд со, бара дудiс.
   Колö тайö сöмын помöсдiнса енлы эскысьяслы. Оз дерт маслозаводыс, а вичкоыс, кöнi öнi вый-нöк вöчö "Помоздинo" СПК. Найö и "вöтлöны" вöвлОм Свято-Успенскöй вичкоысь...

   Видзöдан телевизор пыр, кыдзи чина йöзыд кытшлалöны-шлювъялöны быдлатi: уджаланiнъясты, велöдчан-бурдöдчанiнъясты, ...- Ставыс лючки-бур! мича да долыд! А мый налöн волöм бöрын кольö? Мый вежсьö? и кодарö?! ...

0

42

"Помоздино" СПК-лöн öнiя вый вöчанiн (водзын - вичко).
Выль вый вöчанiн (водзынджык - нянь пöжаланiн).

увеличить

увеличить

увеличить

увеличить

0

43

Мый сэсся татчо шуан. Кужоны миян йоз (70 вонад велалiсны) пыльто глазаясад пускаитныто и кытсюро нюлыштныто.

0

44

20.08.2009 стройка сулал#. Балакин Дмитрий Валерьевич (ООО "Северспецпоставка") ыстысь# деньга мынтыт#мысь СПК "Помоздино" выл#. СПК "Помоздино" ыстысь# УКС выл# озп# тш#ктыны мынтысьны. Й#з оз уджавны, деньга оз мынтыны.

0

45

Помöсдiн больнича бердса клинико-диагностическöй лабораторияын
уджалöны зэв бур специалистъяс

Помöсдiн больнича бердса клинико-диагностическöй лабораторияын уджалöны зэв бур специалистъяс. Медся дыр уджалысьыс Майя Ивановна Игнатова. Сордйывса ань Сыктывкарса медучилшце помалöм бöрын танi зiльö фельдшер-лаборантöн 36 во нин. Удж зэв кывкутана: кымын лючки вöчасны анализъяс, сымын стöча пуктасны диагноз. Сорсьыны некыдз оз позь. Тöдöмлунъяс содтöмöн да ыджыд опытöн Майя Ивановна шедöдiс квалификациялысь вылыс тшупöд. Бур уджсö пасйöма Коми республикалы бура служитöмысь нимöдан пасöн да Коми республикаса юралысьлöн почёт грамотаöн, кодöс сетiс ачыс В.А.Торлопов больничаö волöмöн.

Майя Ивановна зэв водзмöстчысь и öтувъя олöмьш. Радейтö сьывны. Ветлöдлö больничалöн «Зарни сьылан» котырö, кодi тöдса Помöсдiн вожын и районын. Бур кöзяйка да мам. Сылöн кык челядь да вит внук, кодъяслы век вичмöдö кад.

Галина НЕСТЕРОВА
Парма гор
28.01.2010

0

46

Помöсдiнса больнича: водзö воськовъяс

Районын 11 участкöвöй больнича. Медся уна йöзöс могмöдысьыс Помöсдiнса, код улын 15 cикт да посёлок, 5648 морт. Кутшöм тöждöн-могöн олö бурдöдысьяслöн котыр, висьталiс больничаöн веськöдлысь Людмила Светозаровна УЛЯШЕВА:

- Нимкодь, мый коймöд пай вылö содiс кага чужöм, этшаджык кулöны йöз. Кутам лача, мый тадзи лоö и водзö. Но майшöдлö сiйö, мый ёна кутiсны висьны да кадысь водз кувны уджавны вермысь йöз. 2008 воын кувсис 37, 2009-öдын - 44 морт.

Кольöм воын больничаса уджалысьяс майшасисны сы вöсна, мый кöсйисны чинтыны налысь лыдсö. ФОМС эз примит миянлысь 14 ставка, эз кöсйы вештысьны наысь. Мунiс воча райадминистрация, босьтiс ас вылас, öти ставка джын кындзи, ставсö, мед вичмöдны удждон. Талун больничаын уджалö 111 морт.

Эз мун воча бурдöдан министерство, чинтiс терапия юкöнысь сутки чöж куйлан вит койка, кöть пыр вöлi висьысь да найöс бурдöдан план тыртiм 118 процент вылö. Сиктса скод вылын бурдöдан министерствоса веськöдлысьöс вежысь Сергей Викторович Колесников тöдчöдiс, мый йöз лыд серти колö терапияын 6 да челядь юкöнын 2 койка. Но ми койка лыд эг чинтöй. Вöчам ставсö, медым могмöдны висьысьясöс, дзик быдöнöс. Колö кö, мортсö быть бурдöдам стационарын. Регыд на районса юралысь чукöртлiс буретш та йылысь сёрниöн. Шуим видзöдлыны, кыдзи миян удж мунас ФОМС-кöд январын да февральын. Оз кö кöсйы вештыны 5 койкасьыс да бурдöдан план вевтыртöмысь, ас вылас рöскодсö босьтас бара жö райадминистрация. Во кежлö колö 200 сюрс шайт. Бур кöть сiйö, мый уджалысьяслы ФОМС кöсйысис вештысьны ставнас.

Уджалö 5 врач - 3 терапевт, педиатр да хирург, кык пинь бурдöдысь да акушерка. Хирург пырö Кулöмдiн районса шöр бурдöдчанiнлöн штатö, но уджалö танi.

Больнича бердын эмöсь бактериологическöй да клинико-диагностическöй лабораторияяс, рентген-флюорография, процедурнöй, УЗИ, туберкулёзлы паныд тышкасян да физиокабинетъяс, автоклавнöй. Бура уджалö тэрыб отсöг сетан служба. Падмöдö сiйö, мый абу диспетчерскöй пункт.

Больничалы ёна отсасьöны фельдшерско-акушерскöй пунктъяс. Татшöмыс öкмыс. Ставас специалистъяс.

Унатор сяммим вöчны кольöм воын. Пырöдчим федерациялöн «Софинансирование» программаö. Вичмöм сьöм отсöгöн ньöбим тэрыб отсöг сетан службалы куим выль машина. Асьным вештiм сöмын коймöд пайсö. Райадминистрациялöн да Сыктывкарса ЛПКлöн эм «Социальное партнёрство » öтувъя программа, мый серти миян больничалы вичмис 200 сюрс шайт. Ньöбим пинь бурдöдан выль установка. Йöзлы оз ков виччысьны кузь öчеред, кыдзи вöлi водзтi. ФОМС весьтö ньöбим биохимическöй анализатор, шонтысян приборъяс.

Ыджыд удж бергöдiм дзоньтасьöмöн, сы вöсна мый гöгöр вöлi киссьöма. Бара жö отсалiс районса администрация, вичмöдiс сьöм. Куим воöн райбюджетысь сетiсны 3 миллион шайт. Вежим челядь юкöнлысь вевтсö, быд корпус-ын краситчим-пелькöдчим, нюжöдiм ва да шоныд сетан трубаяс, лöсьöдiм канализация. Таво урчитiм кыпöдны гараж.

Висьöмъяс бурдöдöмысь кындзи верманасö вöчам, медым йöз эз висьны. Медводз-кö, диспансернöй учёт вылын сулалысьясöс ас кадö мöдöдам специалистъяс дорö, кодъяс тшöкыда волöны Помöсдiн вожö. Бура могмöдöны районса врачьяс. График серти воöн öтчыд волöны быд сиктö, видлалöны челядьöс и олöмаöс. Волöны и карса специалистъяс. Бöръя вонас нуöдiм уджалысь йöз пöвстын содтöд диспансеризация. Дзоньвидзаыс сöмын 7 процент.

Йöз аттьöалöны карса врачьясöс. Примитöны локтысьясöс войшöр кадöдз.

Больничаын дафельдшерско-акушерскöй пунктъясын зэв кывкутысь, унджыкыс дыр нин уджалысь да ыджыд опыта йöз. Сiдз, терапевт, Валерий Михайлович Игнатов танi 41 во, СССР-лöн здравоохранениеса отличник, сылы сетöма Коми республикалы бура служитöмысь ошкана пас. Комын сайö во уджалöны терапевт Елена Павловна Еф ремова, медсестра Эмилия Ивановна Ефремова, Лидия Дмитриевна Карманова, Зоя Николаевна Жоголева, фельдшер-лаборант Майя Ивановна Игнатова. Ена зiльöны врач-педиатр Виктория Львовна Григорьева, старшöй медсестра Надежда Борисовна Лодыгина, медсестраяс Зоя Васильевна Шахова да Вера Николаевна Карманова. Кöть уджалö и регыд на, бур боксянь асьсö петкöдлiс том врач Сергей Серафимович Дёмин. Бур уджалысьöн вöлi Дiасёръяысь Лидия Робертовна Карманова, кодi кувсис неважöн. Бур уджöн нималöны Пузлаысь фельдшер Анна Ивановна Мингалёва да акушерка Лидия Калистратовна Завьялова, Улыс Ярашъюысь Надежда Владимировна Нехорошева, Вылыс Ярапгыоысь Надежда Васильевна Третьякова, Кырнышаысь Нина Константиновна Игнатова. Колö пасйыны и тэрыб отсöг сетан службаса водительяс Василий Ионович Игнатовöс да Василий Иванович Уляшевöс. Пыр дасьöсь петны туйö. Больничалöн сöстöмлун санитаркаяслöн зiльöм сайын. Меддыр уджалöны терапия юкöнын Нина Васильевна Курочкина, Альбина Валерьевна Карманова, челядь юкöнысь Валентина Степановна Шомысова, Дiасёръяса бурдöдчанiнын Тамара Ивановна Загородникова.

Ми вöчам ставсö, мед йöз висисны омöльджыка, öтарö бурмöдам медицинскöй отсöг сетöм. Месöмын эз дзескöдны вылiсянь: эз чинтыны уджалан местаяс, стационаръясысь койка лыд, öд тайö ставыс инмö йöзлы. Колö содтöд öти педиатр: участок ыджыд, челядь уна. Бур вöлi, больничалöн штатö кö пыртiсны нöшта гинекологлысь да хирурглысь ставкаяс.

Галина НЕСТЕРОВА.
Парма гор
18.02.2010

0

47

Öтувтчöм лöсялас

Коми республикаса Государственнöй Сöвет вынсьöдiс кывкöртöд, код серти öтувтiсны «Березовка» да «Чикшино» овмöдчöминъяс. Эз-ö пансьы республика пасьта овмöдчöминъяс öтувтöм?

- Республикаса вöвлöм юралысь В.А.Торлопов на шыöдчылiс та кузя районса юралысьяс дорö да корис юксьыны асланыс мöвпъясöн, -висьталiс «Коми республикаса муниципаль-нöй котыръяслöн сöвет» ассоциацияса исполнительнöй секретар А.Н. Ткаченко, кодi неважöн волiс Кулöмдiнö. - Таын коланлуныс эм.

Збыльысь, сикт öтувтöмъяс йылысь сёрни мунö важöн нин. Райсöветса депутатъяс шыöдчылiсны весиг Госсöветö, вöзйисны öтувт-ны Носим Кулöмдiнкöд, Парч Немдiнкöд, Дзоль Зимстанкöд, Аныб Ручкöд, но Госсöветын тайö вöзйöмсö бöрыньтiсны. Ена зiлис öтувтны районса вöвлöм юралысь А.П.Юдин. Сы дор вöлiны райсöветса вöвлöм председатель А.А.Кузнецова, Парчса юралысь Р.И.Лодыгин, кöть Парчöс да Лебежнöйöс вöзйисны öтувтны Немдiнкöд. Менö майшöдлiс Дiасёръяöс Вöльдiнкöд öтувтöм да сувтi паныд. Посёлоксянь 40 километр сайын Югыдтыдор деревня, кытчö гожöмнас веськалан сöмын ва туйöн, зэв сьöкыд воöдчыны и тöлын. Югыдтыдорсянь Вöльдiнöдз 100 километр да деревнясалы сэтчö локсьöма. Уна депутат сувтiс ме дор, сöмын делöсö помöдз эз вайöдны. Гашкö, сы вöсна, мый администрацияяслы районса бюджетысь сэки вичмис тырмымöн сьöм, да и кыз уджсö вöчис на пыдди районса власьт.

Öнi серпасыс мöд. Районын 21 овмöдчöмин. Бура сьöмöн олö сöмын Кулöмдiн, сы вöсна мый юрсиктын матö 6 сюрс морт, уна предприятие, организация, учреждение, ас вылö уджалысь да бюджетö воö вель уна сьöм, таво нажöвитiсны 9 миллион шайт. А сэтшöминъясын, кыдзи Аныб, Дзоль, Парч, олöны 200 сайö мортöн, кöнi абу производство, эндö мувидз, овны вывтi сьöкыд, кöть юралысьяс и зiльöны мыйкö да вöчны. Абу позянлун весиг кутчысьны, непöштö сöвмыны. Бурджык лоö, найö кö öтувтчасны ыджыдджык овмöдчöминъяскöд. Руч вожын позьö да и, тöдöмысь, колö öтувтчыны Дереваннöйлы, Ручлы да Аныблы. Примерыс эм. Водзтi Дереваннöйса, Ручса да Аныбса отделениеяс пырлiсны öти котырö - «Ручевскöй» совхозö, кодi вöлi районын буръяс лыдын. Парчса да Лебежнöйса олысьяс уджалiсны öти овмöсын жö, «Усть-Немскöй» совхозын.

Носим да Паспом орччöнöсь юрсикткöд. Водзтi танi сиктсöвет эз вöв, йöз пырисны Кулöмдiнса улö. Падмöгъяс вöлiны Эжва вомöн вуджöмöн, но öд öнi эм пос.

Ылi сиктъясын олысьяслы справка да мукöд документ босьтöм вöсна майшасьны оз ков. Эм та кузя бур пример Югыдъягса администрациялöн. Кор сэтчöс уджалысьяс мунöны Белоборскö ли Канаваö, аскöдныс босьтöны печать, бланокъяс да сеталöны быдсяма справка. Кöнi эм бур туй да малань, волöны асьныс. Пример вылö, Пожöгö волöны Вылыс да Улыс Ярашъю, Великополье, Пожöгдiн, Шахсикт, Кекур да Вомынбöж сиктъясса да посёлокъясса йöз.

Неважöн Кулöмдiнö волiсны республикаысь лунвыв районъясса юралысьяс. Найö шуисны уджавны öтвылысь öтувъя программа вылын. Сöмын тадзи позяс мунны сöвмöм туйöд. Ме серти, лöсялас öтувтчöмыс и овмöдчöминъяслöн.

Николай ЛЮТОЕВ,
райсöветса депутат.

Редакциясянь: корам Эжва йывса олысьясöс сюртчыны гижöд дорас, вöзйыны ассьыныд мöвпъяс.

Парма гор
20.07.2010

0

48

Бурджык оз ло

Лыдди «Парма гор» газетлöн июль 20-öд лунся номерысь Николай Александрович Лютоевлысь «Öтувтчöм лöсялас» гижöд да юкся аслам мöвпъясöн.

Война воясö ёна гöльмöм да джынвыйö киссьöм деревняясын кыдзкö кутчысисны дзоляник колхозъяс да бригадаяс, но бöр кыпöдчыны эз вермыны. Сэки быть колiс öтувтчыны ыджыдджык семьяö, медым öтвылысь öдйö сöвмöдны овмöс да бурмöдны йöзлысь олöм. Лоисны гырысь колхозъяс, а бöрынджык и совхозъяс. Ена öддзис стрöитчöм, видзьяс-муяс паськöдöм да бурмöдöм. Сöвмис и культурнöй олöм.

Сэки жö республикаын лöсьöдiсны асшöр Помöсдiн, Сторожевск, Летка да мукöд районъяс. Олöм кутiс бурмыны лунысь лун. Мыйлакö бöрынджык öтувтiсны Кулöмдiн да Помöсдiн, Сторожевск да Кöрткерöс районъяс да с.в. Но сэкся олöм öнiякöд öткодявны оз позь. «Перестройка» нуöдöмöн да капитализмö бöр бергöдчöмöн, странаын кутiс ыджыдавны криминал. Заводитчис öтиясöн мöдъясöс нартитöм. Лыдаяс озырмисны да водзö озырмöдчöны сюрсъяс весьтö. Заводитчис страналысь озырлунъяссö восьсöн грабитöм да вузалöм.

Мыйла ковмис власьт кутысьяслы öтувтны посни сиктъясöс да деревняясöс? Медым дугöдны налысь ньöжйöникöн кусöм? Либö отсавны налы öдйöджык кусны да бырны карта вылысь? Стувтчöм бöрын бырöны важ деревняяслöн нимъяс. Бырö и на вöсна власьтъяслöн тöжд. Öнi деревняясысь босьтны, гашкö, нинöм нин эз коль. Öнi öдйö куштöны налысь медбöръя радлун — вöр. Сикт-деревняясын öнi оз гöрны, оз кöдзны, бырö скöт видзöм, кисьтöны важöн лэптылöм фермаяс, складъяс, оз вöчны выльясöс. Сувтас-ö сиктъяслöн водзö кусöм? Ме думысь - оз. Кытчöдз оз вежсьы власьтъяслöн öнiя олöм вылö видзöдлас. Бырöны ичöт деревняяс. И сэнi чужлöм да олысь йöзлы бурджык олöм оз во.

Владимир ИГНАТОВ,
Сордйыв.

Парма гор
31.07.2010

0

49

Жугыль синъяса стрöйба

Кыдз кежявла Помöсдiн «Горт ягö», сiдзи и син улö шыбитчö ортсысяньыс быттьö пелькиник, югъялысь вевтъяса, но шудтöм стрöйба. Нимыс сылöн - «Выль вый вöчан завод». Мыйла -«кавычкаын»? Да нимыс сöмын и эм. Менö кыдзкö майшöдлö тайö стрöйбаыслöн (сельполöн вöвлöм нянь пöжалан заводлöн) аскиа луныс. Мем мыйлакö омöля эскыссьö, мый коркö тан кутасны вöчны чöскыд вый да сыр. А мыйтта сёрни нин мунiс стрöйба кузяыс ... Миллион шайтъяс шыбитiсны бюджетсянь сiйöс пелькöдöм-дзоньталöм вылö. Коли сöмын вайны оборудование да пуктыны. Но бöръя воськовсö вöчны оз вермыны. Бара ставыс дзуртö, кытчöкö пыксьö. И зымвидзö аснаукнас стрöйбаыс, быттьö шöйöвошöма.

Веськыда шуам: сылöн, кыдзи маслозаводлöн, аскиа луныс руа. Вермас лоны, мый сьöмсö вылiсянь сэсся оз и чуктöдны. Экономическöй «перспективаыс» оз тыдав. Кодi кутас переработайтöм могысь вайны татчö сiйö жö йöвсö? Пожöгса да Помöсдiнса СПК-яс? Но найö талун-аски киссясны. Фермеръяс? А кöнöсь найö? Частникъяс? Деревняын лыда мöс коли. Водзвыв колiс артыштны да думыштны. Пыдiсянь. Медпервой - ёнмöдны Пожöгса да Помöсдiнса СПК-яслысь материальнöй подувсö, стрöитны выль картаяс, мед мöс лыд эз чин (а кытысь мöстöгыс йöлыд?) Талун - шензьöдана серпас. Бöръя карта вевтъяс мöс юръяс вылö киссьöны. Гырысь скöт лыд сэтшöма увлань чеччыштiс, мый водзö некытчö нин. Oтувъя овмöсъяс миян районын бырасны, и тайö - курыд збыльтор. Колö водзвыв дасьтысьны та кежлö. А öнi найö кутчысьöны. Енджыкасö олöма йöз вылын, кодъяс «нэмсö уджавлiсны» видз-му овмöсын да сыысь мынтöдчыны оз нин вермыны. Унджыкыс - пенсия вылын либö пенсия кад виччысьöны. Удждон пöшти оз аддзывны. А öнiя том йöз куйöдöн тырöм да киссьöм картаясад оз локны. Да и найöс уджавнысö некод эз велöд. Чöскыда вöтасьöны, кыдз эськö ёна «мыр берттöг» кыз нажöтка босьтны. Со и чужöны тöв чужъялысь «менеджеръяс» да «дилеръяс».

А водзö мый? Кутам сёйны Пакистанысь вайöм картупель. Бразилияысь вайöм яй. Бур, Киров кö могмöдас. А öвтыштчас кö миянысь? Войвылад видз-му овмöс вöдитöмыд нэмсö ыджыд выгöда эз вайлы. Да и быдлаын сiдз. Но медпервой детсадъяслы, больничаяслы да школаяслы свежöй йöв да яй вöсна öтувъя овмöсъястö государство сойборд улас пыр кутiс, ёна отсалiс. И талун отсалöны. Но оз миянын, а мукöд государствоясын. Войвывса видз-му овмöс вылö миян гырысь властьяс важон нин «крест» пуктiсны. Вылiас помся ошйысьöны кутшöмкö «миллиардъясöн», кодъясöс чуктöдöны видз-му овмöслы. Кöнi сьöмыс? Мыйла оз во места вылöдз? Кодлы вичмö?

Гöгöрвоана: рыночнöй экономика. Чорыд, некодöс оз жалит. И сы дорö колö велавны. «Бöрдöмтö» оз нин кывны, нюжöдöм киясад прöстö сьöмтö оз нин сетны. Колö ставлы вежсьыны, колö мöвпавны, колö кутшöмкö прибыль йылысь думайтны. Колö видз-му овмöсын выль проектъяс дорйыны, мед кредитъяс босьтны. Но миян сэтшöм йöзыс лыдаöсь. Ставным на важ моз мöвпалам, дотацияяс молитва сорöн корам. Да и кодi кутас талун рискуйтны видз-му овмöсын? Торйöн нин -войвылын? Нокыс додь тыр, а рискыс...

Медся жугыльыс -öтувъя овмöсъяскöд öттшöтш киссисны деревняяс. Юсьöны томъяс. Бырис бöръя удж. Вошис коми йöзлöн нэмöвöйся укладыс. Вот таысь страк босьтö. Но мыйлакö омöля майшöдлö тайö быдсяма гырысь чиновникъясöс, властьöс. Но тайö -мöд сёрни нин, политикаас прöстö дыш пырны. Тöдан: нинöм оз вежсьы. А чиновникъяслöн мича сёрни да «кыпыд» лыдпасъяс пытшкын сöмын пöдан.

А мый Помöсдiнса «вый вöчан выль заводкöд»? Ме ог тöд. Некод оз тöд. Сулалö жугыльтчöм стрöйбаыс, виччысьö йöзлысь бöръя кывсö. Оз кö вöчны вый заводсö, мед кöть нин кутшöмкö бур киö сетасны. Миллионъяс дзоньтасьöм вылö сюйисны, нöшта ачыс на стрöйбаыс уна миллион сулалö. Эн лэдзöй лапкыштны стрöйбаыслы, эн эновтöй. Кöзяинтöм кö коляс, öнiя кадад вежонöн и кисьтасны-резьöдасны. Вот таысь и пола.

Александр ШЕБЫРЕВ.
Парма гор
28.10.2010

0

50

Сёрнитiсны районлон аскиа лун йылысь

Коми республикаса юралысь Вячеслав Гайзерлöн Кулöмдiнö локтöдз кöсйи тöдмавны кыктор: мый петкöдласны сылы районса веськöдлысьяс да Эжва йылöс социально-экономическöя сöвмöдöм кузя кутшöм проектъяс дасьтасны. Веськыда кö шуны, районса веськöдлысьяслы ёна ошйысьнысö нинöм. Асланым доходыс сöмын 27 процент, öстальнöйыс воö «вылiсянь». Эжва йылын оз стрöитны выль школаяс (сöмын Ягкöджын тувъялiсны сваяяс выль школалы - авт.). детсадъяс, культура керкаяс, клубъяс, больничаяс, скöт картаяс. Оланiн стрöитöны асьныс йöзыс. Эм сöмын öти шедöдантор: восьтiсны республикаын медводз, кыдз асьныс шуöны чина йöз, сиктса рынок. Но комиссия сiйöс эз на примит. Да и, кыдз донъялöны специалистъяс, сiйö абу рынок да ярманга. Рынок уджалö быд лун, а Кулöмдiнса «рынок» вежоннас сöмын öти лун. Эг тöд и, кутшöм проектъяс эмöсь район сöвмöдöм кузя. Сiдз, миянöс, райсöветса депутатъясöс, наöн эз тöдмöдны.

Вячеслав Гайзерлы, збыльысь, нинöм сэтшöм тöдчанасö эз петкöдлыны. Аддзысьлiс сöмын Стрöительяслöн улича вылын ас керка стрöитысьяскöд да Ленин уличавывса киссьöм керкаын олысьяслöн элясьöм кузя видзöдлiс 24 патераа олан керка (сьöм абутöм вöсна сы вылын уджъясыс оз мунны - авт.). Керкасяньыс Республикаса юралысь веськыда мунiс районса администрацияö да нуöдiс сöвещание.

Виддалiсны зэв колана да тöдчана юалöмъяс Эжва йылöс социально-экономическöя сöвмöдöм йылысь. Но шемöсмöдiс сiйö, мый зал джынйыс вöлi куш. Син улö усьлiс сöмын кык ас вылö уджалысь: В.В. Белый да П.М.Попов. 25 райсöветса депутатысь вöлiны сöмын нёльöн. Сувтiс пыр жö юалöм: кыдзи районса администрация ас вылö уджалысьястöг, предприятиеясöн веськöдлысьястöг, райсöветса депутатъястöг кöсйö сöвмöдны район.

Коми республикаса юралысьöс вежысь Владимир Тукмаков тöдмöдiс районса администрацияöс вöзйöм проектъясöн. Со найö: Помöсдiн сиктын вöвлöм нянь пöжалан заводысь йöв переработайтан цех вöчöм, Пожöг видз-му овмöс кооперативлöн Пожöгдiнса 100 юр вылö мöс карта капитальнöя дзоньталöм, Кебанъёль посёлок дорын «ЦентрВудКом» котырöн вöр пыдiсянь переработайтан завод стрöитöм, ас вылö уджалысь В.В.Белыйöн вöр переработайтöмлысь вынйöрсö паськöдöм, «Конкрит РСК» котырöн карьерысь изйысь щебень вöчöм, Кулöмдiнын вузасян комп-лекс стрöитöм. Но Владимир Тукмаков 6 проектысь лыддис коланаöн сöмын щебень вöчöм. Сiйö лыддьö, мый районын лыддьыссьö 50 культурнöй да историческöй памятник, и колö паськöдны туризм да традиционнöя вöчасьöмъяс. Но тайö районса администрациялöн планас абу.

Вячеслав Гайзер öлöдiс районса юралысь Сергей Каплинöс, мый йöв завод стрöитiгöн да мöс карта выльмöдiгöн оз ков надейтчыны республикаса бюджетысь сьöм вылö. Тайö проектъяс вылас сьöм оз вичмöдны. Колö места вылын корсьны позянлунъяс.

Вячеслав Гайзер лыддьö, мый районын оз тырмы сьöм и абуöсь водзмöстчысь йöз. Вермас лоны, мый татшöм йöзсö Кулöмдiнса му вылö ковмас вайны бокысь. Республикаса юралысь вöзйис районса юралысьлы öтувтны том йöзöс да вöзйыны налы кутшöмкö олöмö пöртана проект, оз кö вермыны восьтны ассьыныс делö торйöн. Эскöдiс, мый Коми республикаса правительство отсалас водзмöстчöмас.

Сöвещание вылын сёрни кыптылiс и Ягкöджын 49 велöдчысь вылö выль школа кыпöдöм йылысь. Сыктывкарса промкомбинатысь генеральнöй директор Евгений Королёв эскöдiс, мый школасö помаласны декабрын. Но, кыдзи лоис тöдса, материалсö ваясны сöмын 2011 вося март помын.

Николай ЛЮТОЕВ.
Парма гор
26.10.2010

0

51

Vladimir написал(а):

А мый Помöсдiнса «вый вöчан выль заводкöд»? Ме ог тöд. Некод оз тöд. Сулалö жугыльтчöм стрöйбаыс, виччысьö йöзлысь бöръя кывсö. Оз кö вöчны вый заводсö, мед кöть нин кутшöмкö бур киö сетасны. Миллионъяс дзоньтасьöм вылö сюйисны, нöшта ачыс на стрöйбаыс уна миллион сулалö. Эн лэдзöй лапкыштны стрöйбаыслы, эн эновтöй. Кöзяинтöм кö коляс, öнiя кадад вежонöн и кисьтасны-резьöдасны. Вот таысь и пола.

Вый вöчан завод кыпöдны колö сьöм да морт (кужысь, тöдысь да уджавны кöсйысь), кодi босьтчас заводсö кыпöдны. Но унаöн нин танi "кисö сотiсны" и öдва-кö татчöс морт кутчысяс тайö уджö.
Но медсясö колö кöсйöм СПК "Помоздиноса" юралысьяслöн Вый вöчан заводсö кыпöдны.

0


Вы здесь » Бадьёльйывсаяс - Бадьёльские » Кулöмдiн. Усть-Кулом. » Эжва йывса асыв


Создать форум