Бадьёльйывсаяс - Бадьёльские

Информация о пользователе

Привет, Гость! Войдите или зарегистрируйтесь.


Вы здесь » Бадьёльйывсаяс - Бадьёльские » Коми кыв. Коми язык. » Новые слова в Коми Языке


Новые слова в Коми Языке

Сообщений 31 страница 40 из 40

31

Времени мало, так что напишу сюда. Вот электронный русско-коми, коми-русский переводчик http://ifolder.ru/15408131

З.Ы. Вы тока сильно меня не бейте, если не там написал)))

0

32

Cnukep написал(а):

З.Ы. Вы тока сильно меня не бейте, если не там написал)))

Живи до каникул, как приедешь разберёмся. :D

0

33

(О.Уляшев ОРÖМ ВУЖЪЯСЫСЬ КЫÖМ КЫВВОР
пом)

     Да, канкыв тшупан уджыд абу кокни. Позьö-ö коми кыв тöдысьöн шуны мортöс, кодi челядьлы вöзйö «вежлöг — падеж», «сёрникузя — предложение» да св. терминъяс. Коми морт веж лöгсö сöмын öти ног гöгöрвоö, да и серникузяыд — рочöн абу 'предложение', а 'продолжительность разговора'. Но öд уджö босьтчисны зiль да ловъя кыв тöдöмöн дзескöдтöм йöз. Кызвыныс Микайлö-арканделöдз комиöн шы эз сетлыны, важöн коми олöмысь да ловъя вужйысь орлöсны. Медбöръя коми лингвистъяс кувсисны кöкъямысдасöд-öкмысдасöд воясö.
     Мед эз ылöса ло шуöмыс, бара жö ыстыся «Выль коми кыввор» вылö, кöнi син водзын вежсьöны нэмбвöйся кыв вежöртасъяс, а нэмöвöйся жö, но авторъяс пельö инмывтöм пыдди пыртсьöны некор вöвлытöмъяс. «Аньтуй пö — талант, дар», но öд аньтуйыс йитчöма сöмын нывбабакбд (< анъ), сiдзкö нö морттуя мужикыс эз нин коль, али морт кö босьтчö картина, музыка, кывбур гижны, сiйö пыр жö пöрö нывбабаö?!? «Арта кö — официальный», «арттöм — неофициальный», сiдзкö инöн-артöн овны вермасны сöмын чиновник гозъя асланыс «гозъёрткöд»? Кöть эськö артманног да вежöртас сертиыс гозъёртсö роч вылö вуджöдны колö не «супруг, супругаöн», а друг семъиöн. «Асалысьöн» комияс пыр шулiсны гусясьысь, горш да колысь мортöс, а эз ас овмöсöн олысьöс, «кидöсöн», кидусöн — эз «видимость», а низь да туланлысь писö, «юрвотыд» 1930 воясö на вöлi: подуш¬ной налогöн, а эз «шапкаöн». Синчöжнас ко комияслöн шусис тывйын-кулöмын косяссьöм-быздöмин либö кольöм гöрöдъяса син, сiдзкö, «синчöжöсь чувкиыс» — рочöн абу «ажурные чул¬ки», а чулки с затяжками (нывбабаяс гöгöрвоасны). «Бимегыртö» комияс öнöдз шулiсны öшкамöшкаöн, «быгыль» — косьтöн да коськöн, «нывбур» — дзоньöн, «повзьöмлун» — повзьöмöн. Рюкзакыс коминас нэмыс вöлi ноп, а ракнопöн шулiсны сöмын льöм ньöрйысь да сюмöдысь кыöм волыса станок.
     Видзöдöмапöрйö, кывтшупысьяслöн мöдтор вылö морттуй оз тырмы, а водзмöстчыны-кыпöдчыны кöсйöмыс ыджыд. Видзöдан да, колана книгасö дас воясöн лэдзны оз вермыны бур йöзыс, а некытчö шогмытöм коми кыв виан кывворъяс выло кыськö и деньга сюрö, и кад корсьöны...
     Канкывтэчысьяс ыстысьöны, дерт, медводз кыв политика вылö. Мудöдувса понтшак кодь нэриник да ковтöм, но век жö политика... Со и артмö, мый важ комиыс КАНКЫВсö оз гöгöрво, а выль комисö кидтöны КОМИ кывсьыс дзолясянь, мырдöналöны нэриник юрсö, орйöдлöны жебиник вужсö. Гортын, быд лунъя олöмын öд миян челядь оз кутны канкывйöн сёрнитны: он вермы сiйöн морт ног висьтавны олöм-вылöм йывсьыд, ловтö восьтыны, весиг ва стöкан сiйöн он кор. (Стöканыс — рочысь пырöма (< важ роч дъстъкан), а кодлöн нö кывйыс бергöдчас шуны: «Вай меным йикодьюгыд-пырыстыдаланаюандозйöн ва»?) Комиа-роча, Роча-комиа кыв-кудъяс, выль кывворъяс век сьöрад он видз: кудйыд — джаджйын, ворйыд — гидын. Со и рочмö коми челядь-гавез, бырö ко-ми войтыр, помö воö, пöль-пöчöн лелькуйтöм вужсö вунöдö. Сы пыдди выль кывйыс зэра поводдяö номырöсь тшак мында быд лун мыччысьö. Оз узьны кыв сузлялысьяс. Ок, оз узьны.
     Эз бурö вайöд коми эсперантотö лöсьöдöмыд. Да нинöм и водзö сысянь виччысьны. Koдi комисö эз тöд, сiйö öдйö велалiс канкывъяд (вежöрас нинöмлы сорасьнысö), колскöны сöмын телерадиö пыр, газет-журнал пыр: уджтасъяс, кипасъяс, мöвпаланлунъяс, повзъöмлунъяс, пертасъяс, пыртасъяс... Комилöн -тас, -пас да -лунысь öприч сэсся нинöм эз и коль. Косьмис коми кывйыс, висьлöс вежöрöн чужтöм кывъясöн озырмис сöмын канакыв. Быттьö дöзьöртöг кольлöм кагаöс мутияс вежисны. Кывворъяс петöны, но сюрас-ö коркö сэтшöм ворйыс, код улын «вежöмасö» позяс керавны, бöр мортсяммöдны?

0

34

Йöлгинь Цыпанов

О.УЛЯШЕВ ВЕЛÖДÖ КЫДЗИ ОЗ ПОЗЬ ГИЖНЫ

   Тавося кос му тöлысьö «Войвыв кодзулын» петiс Олег Уляшевлöн «Орöм вужъясысь кыöм кыввор» гижöд, юрним улас содтöма: «Цыпанов Е., Безносикова Л. Выль коми кыввор. Сыктывкар. 2005» видлалöм бöрын чужöм мöвпъяс». Тайö гижöд йывсьыс журнал петтöдзыс вöлi пасйöма «Коми му» газетса öти номерö. Медводдзсö зэв окота вöлi тöдмавны, мый йылысь гижö Уляшев уджъёртным (а ми сыкöд уджалам öти Институтын, да туялысьяслöн сöветö пырам, пукалам-уджалам сöмын ог öти кабинетъясын). Выль кыввор чукöртам ми дас воысь унджык нин, йöзöдлiм нин кык петаса «Выль коми кыввор» удж 1998-1999-öд да 1999-öд воясö, но О.Уляшев миянлы тайö уджъяс йывсьыс ни öти кыв эз на шулы ни нинöм эз юавлы. Эз немтор йöзöдлы и газет-журналъясын, тöдöмысь, сэки выль кывворсö ошкылöма. Чайтiм, кыдзкö выль ног кыввор выльмöдöмсö донъялас, а гашкö, мися выль кывъяс, фольклористикаысь да этнографияысь дзик выль коми терминъяс вöзъяс…
   Журнал петöм бöрас гижöдсö сылысь лыддим да шемöсö усим: кывтуялан наука ни материал боксяньыс нинöм выльсö да киö босьтанасö гижöд пöжалысьыслöн абу и вöлöма, став татшöм сёрнисö дас сайö во чöж нин унаысь кывлывлiм да. Мöвпъясыс сылöн вöлöмны дзик öтпöлöсöсь: выль кывворыс коми кывйын ковтöм да нинöм бурсö оз вай. Со и став сiдз шуана мöвпыс. Тайöс кодсюрö унаысь нин висьтавлiс. Но торъяланлуныс Уляшев гижöдыслöн эм: сiйö эскöдö лыддьысьысьöс, ыштöкö асьсö кывсö выль кывворыс пö виö, неологизмъяс чужтысьясыс некытчö туйтöм специалистъяс пö, коми кыв тöдтöм йöз. Гижöдас авторыс лёкöдö и кыв материалсö, и кыввор лöсьöдысь-паськöдысьяссö. Статьяыс тырöма лёкалöмöн, лöглунöн, немортногса агрессияöн. Дерт, тайö гижöдторнас О.Уляшев ставыслы восьтiс ассьыс збыль чужöмсö. Тайöс тырвыйö тöдмалiсны медводз коми войтыр, «Войвыв кодзув» лыддьысьяс.
   Быд гижöд кыв историяын кадысь кадö пансьывлö выль кывъяс вöсна вен. Тайö быть лоанатор. И медводз сы вöсна, мый öтияс артмöдöны выль кывъяссö, мöдъяс сувтöны налы паныд. Татшöм веныс, бура кö подулалöма, отсалö бöрйыны кывлы коланасö. Нöшта нин сэк, кор вензьöны ышнясьтöм, вежавидзысь йöз, кывсö пыдiсянь  гöгöрвоысьяс да гöгöрбок донъявны кужысьяс. И зэв лёк, кор венö кутчысьöны ошйысьысь, вылö пуксьысь  йöз да няйтöсьтöны зiльысьясöс, мöд ногöн мöвпалысьясöс. Торйöн нин кор татшöм уль пöжасъяссö гижöны дилетантъяс, лингвистикаын абу специалистъяс, унатор гöгöрвотöм йöз. Сэки веныс векджык пöрö зык-шумö. Буретш тадзи позьö гöгöрвоны О.Уляшевлысь тавося «Войвыв кодзув» журналлöн  4-öд номерын йöзöдöм гижöдсö.
   Индöм статьяас О.Уляшев ставсö гудралö, дзугö-бергöдлö сöмын аслас чайтöм сертиыс да тырвыйö эрдöдö асьсö. Позис эськö и не пуктыны пыдди сэтысь уна сöрöм; вежöра мортöс, дерт, оз ылöд сылöн гижöдыс.  Век жö лыддям коланаöн вочавидзны ― а друг кодкö и збыльысь эскас Олег Ивановичлы ― сiйö жö филологияса кандидат ним улö дзебсясьö. Но филологияыс öд зэв паськыдтор, кывтуялöм да фольклористика, литературоведение да источниковедение ёна нин разалöмаöсь. Олег Иванович коми кывсö некор эз туявлы да та вöсна сылöн уна гижöмторйын дзугысь кындзи немтор и абу. Тайöс быть колö лыддьысьысьлы гöгöрвоöдны.
   Кыв-мöд лоö шуны статья гижысьлöн тöдöмлун йылысь. Сiйö ёна велöдö кыв туялысьясöс ― кывкудъясöн вöдитчыны, комиöн сёрнитны, кывтö дöзьöритны… А тыдовтчö, мый университетын велöдчигас ачыс пель пöвнас кывзöма филология курссö либö унатор нин вунöдöма. 
   Босьтам кöть татшöмтор: нималана туялысьяс лыддьöны, мый кывöктöд ― тайö кывлöн рöмпöштан, сы серти донъялöны кывлысь озырлунсö да аслыспöлöслунсö, воссьö сылöн вежсьöмыс да войтырлöн важвылöмыс. Быдсикас кывкудйыс колö, тшöтш и неологизмъясöн тöдмöданаыс. И сöмын О.Уляшев лыддьö «Выль кыввор» сяма уджъяссö дзик ковтöмöн, 1700 чукöртöм юркывйысь абу пасйöма ни öти лöсялана-туянатор (!) Ни öти шогмана кыв небöг йывсьыс абу и. Со пö и мöвпъясöй.
   1983-öд воын профессор, академик Б.А.Серебренников волiс Сыктывкарö да сёрнитiс Кыв, литература да история институтса уджалысьяс водзын. Лыддьöдлiс сiйö могъяссö, кодъясöс колö збыльмöдны коми кыв туялысьяслы. Медшöр да медводдза могöн сiйö индiс кывöктöдъяс дасьтöм. Тыдалö, кывчукöрлысь тöдчанлунсö буретш гöгöрвоöм понда век на вичмöдлiсны сьöм словаръяс дасьтöм да лэдзöм вылö миян республикаса культура да национальнöй политика, йöзöс велöдан да вылыс тöдöмлунъяс министерствояс. Сьöмöн отсалiсны тшöтш россияса кывкутысь котыръяс ― небöг лэдзан Федеральнöй уджтас да Федеральнöй торъяморга уджтас серти, а сiдзжö гуманитарнöй наукалöн фонд. Миянлысь öтувъя бöръя небöгсö йöзöдöм вылас сьöмсö лишöдiс Финляндияысь М.А.Кастрен котыр. Öти сайын аттьöалам котырсаöс тайö зэв колана отсöгысь.
   Сёрнитны кö «Выль кыввор» йылысь, колö пасйыны, мый сiйö абу мукöд кывчукöр кодь удж, тайö лексикон, неологизмъясысь фонд. Сiйö лоана кывчукöръяслы подув (мöд ногöн кö, материал). Сэтчö öктöма выль да выльмöдöм кывъяс, кодъяс чужисны бöръя кадö. «Выль кыввор» небöгса водзкывйö сiдзи и пасйöма: «Сылöн шöр могыс юöртана, абу донъялана; олöмыс да кывйöн вöдитчан практикаыс ачыс вочасöн бöръяс медколана да медлöсялана кывворсö». А сэсся нин быд коми морт ― аслас видзöдлас, сямлун, кывлысь аскиа лунсö гöгöрвоöм серти ― бöръяс, вöдитчыны-ö тайö выльторнас. Мырдöн некод оз тшöкты йöзсö (шуам, Уляшевöс ли кодöс ли) сэтысь пырысьтöм-пыр ставсö пыртны сёрни-гижöдö. Донъяв, лыддьысьысь ачыд! Татшöм сяма кывкудъяссö чукöртöны ды йöзöдöны важысянь нин.

0

35

О.Уляшев абу гöгöрвоöма тшöтш, кытысь лои босьтöма небöгö чукöртöм материалсö. Небöгö öктöм быд выль кыв бöрын пасйöма, кодi сiйöн вöдитчöма да кутшöм гижöдысь босьтöма, быд видлöг бöрын скобкаын сетöма ним-ов либö газет-журнал да мукöд татшöмтор пасъянтор. Сiдз, нывбур, райкар ― Ю.Васютовлöн, быгыль, иналун, ожман, öдйöа ― Г.Юшковлöн, кывпас ― Н.Куратовалöн, аньтуй, мортлун ― В.Лодыгинлöн, кывкуд, небöгкуд, подувму, подувйöз, кывбуркуд ― Е.Игушевлöн, йöзсикас, мувый, кывбуравны ― Г.Беляевлöн, вежлöг ― Г.Некрасовалöн, нимвежтас ― Г.Федюнёвалöн, мичкыв ― В.Мартыновлöн, няньпиян ― И.А.Куратовлöн да с.в. Дерт жö, кызвыныс гижысь войтырлöн да кыв туялысьяслöн. И кодi на пöвстысь оз куж сёрнитны коминас, кыдзи оз öтчыд пасйы О.Уляшевыс? Г.Юшков, Е.Цыпанов, В.Лодыгин, В. Тимин?
   Мыйтакö выльтор чужис тшöтш Республикаса кыв комиссиялöн чукöртчылiгъясö, ёнакодь вензьöм да дыр мöвпалöм-видлалöм бöрын. Коркö öд и ачыс Уляшев вöвлi тайö комиссияса членöн ― гашкö, сыысь и дöзмö, öнi комиссияыс уджалö сытöг да. И артмö, мый «вакомистъясыс» («кывтшупысьясыс», «кыв сузлялысьясыс») ― абу кык-куим морт ― а быдса коллектив ― гижысьяс, велöдысьяс, кыв туялысьяс, теле- да радиожурналистъяс, газет лэдзысьяс, кыв комиссияса членъяс (ставнас сёысь унджык морт лоö). Но тайö оз падмöд-сувтöд О.Уляшевöс увтыртны коми кыв сöстöммöдны зiльысьясöс. Да и мый танi чуйманаыс ― сiйö паськыда нин кывсьö нин мортöс пыдди пуктытöмнас. Газет-журнал лыддьысьяс эз на вунöдны öти университетса велöдысьöс, профессорöс сылöн няйтöсьтöмыс (куим автор лыдын вöлi сiйö тшöтш).
   Со и öнi кутшöм мисьтöма  кедзовтö С.Елфимовöс, и сöмын сыысь, мый том мортыс бура кылö-аддзö кыв артманногсö. О.Уляшев дöзмöма, а вот Венгрияысь профессор Карой Редэилы, фин-угор  кывъяс нималана туялысьлы, кодi бура тöдö коми кыв да сёрнитö комиöн, зэв ёна воöмаöсь сьöлöм вылас том мортыслöн вöзйöмторъясыс.  Сiйö весиг пасйис тайö «кывтшупысьлысь» кужанлунсö да енбисö.
   Видлалана гижöдас эм зэв уна нелючкитор, коми лингвистикалысь зумыд тöдтöмлун вöснаыс О.Уляшев унатор гижöма шыбöльöн, тöдтöг, а гашкö, и тöдöмöн дзуглалöмöн. Статья медводдза лист бокас нин шуöма, кызьöд-комынöд вояссянь пö öнiя гижöдö кольöма «кызь гöгöр кыв» да «öнi пö содтöд кыпöдiсны «лёк дук петан розь» да мый да» (62 лб.). Збыльысьсö 20-30 вояссянь кольöма ёна унджык кыв, сэтысь миян культураыс дзоньнас петö да кутчысьö. Форточка пасйысь пасйöм кузь да мисьтöм кывтэчассö некод эз кыпöд, сiйöс абу пасйöма ни öти бöръя кывчукöрö, абу сiйö и коми кыв комиссияöн йöзöдöмторъясын да миян «Выль кывворын». 
   Зэв паныд О.Уляшов мыйлакö улмö кывлы, сiйöн войдöр комияс пасйывлöмаöсь яблöк. Улмöыс пырлöма булгар (важ чуваш) кывйысь, XIX-öд нэмын Г.С.Лыткин на пасйöма аслас кывчукöрас. Но О.Уляшев тайö кывсö видлалiгöн веськыда сöрöма, абутöмторсö гижöма: «Лыткиныс босьтöма кывсö Н.Поповöн гижöм ки помысь гижöм словарысь, а Поповыс лöсьöдлiс словарсö Вöлöгдаын кызвынсö зюзьдинса коми да сэтшöм-татшöм шойданникъяс кыв подув вылын» (64 лб.). Збыльысьсö жö вöвлöм штабс-капитан Николай Павлович Попов (1801-1873) аслас уджъёртъясыскöд 20 во сайö лöсьöдлöма нёль тома «Русско-коми словарсö» сэкся Усть-Сысольскын зырян-коми йöз сёрниысь, ставнас тайö ыджыд уджас 70 сюрс гöгöр кыв. Сылысь фотокопиясö ньöбöмаöсь да вайöмаöсь Республикаса войтырлöн небöгкудйö (библиотекаö). Улмö кывйöн кокниа позьö вöдитчыны гижысьяслы важвылöм йылысь роман-повесьтъясын сэкся коми сёрнисö серпасалöм могысь. 
   Да, тыдалö, О.Уляшевлы абу тырмöма кадыс бурджыка тöдмасьны кутшöмсюрö коми гижöдъясöн. Сiдз, абу лыддьöма аслас земляк П.Шаховлысь «Вежон кежлö том кадö» небöг да синчöжöсь кыв гöгöрвоöдö сöмын сiдз, кутшöм вежöртас тöдса сылы. Да и мыгöрлэптöм дöзмöдö О.Уляшевöс. Пасъям, мый  тайö выль кывсö артмöдысьыс петiс вермысьöн бодибилдинг кыв комиöдан карса венласьöмын. Кывъяссö бöрйыс пыдди пуктана комиссия кывтуялысьяс А.Н.Ракин да А.П.Афанасьев юрнуöдöм улын. Та йылысь юöртлiс «Коми му» газет. Руочи, рубöж, кидöс кывъяс паныдасьлöны зэв тöдчана да лыддьысьысьлы сьöлöм вылö воана «Бива» романын. И сэн  жö нималана коми гижысь Г.Юшков гöгöрвоöдö найöс лист бок помын (видзöд «Войвыв кодзув», 1996, 2 №, 13 л.б.). Статьяын сорсялöмöн пасйöма и коми гижысьясöс: В.Куратовлысь киллюшка кыв сюйöма Г.Юшковлы.

0

36

Шемöс босьтö: филологöс кезйöдлö кывйын выльтор чужöм-писькöдчöмысь да сiйöс öтлаö чукöртöмысь. Бара жö лоö юöртны лыддьысьысьлы, мый кыв туялысьяс-лексикографъяс быдлаын вöчöны татшöм уджсö. Сiдз, немеч кывъясысь мездысигöн да ас кыв водзö сöвмöдöм ради Венгрияын артмöдöмаöсь-лöсалöмаöсь 10 сюрс гöгöр кыв. Абу повзьöмаöсь кыв выльмöмысь, вуж орöмысь. Роч языковедъяс чукöртöны да быд во йöзöдöны выль кывъяссö 1971-öд восянь; быд петасын налöн 1500-2000 гöгöр кыв да кывйитлöс. И оз кывсьы, мый кодкö пинь мурч курччымöн скöрмö татшöмторсьыс.  Оз эндöдны чукöртан уджсö и Марий Элын. Сiдз, проф. И.Г.Иванов йöзöдiс торъя кывкуд, кытчö öктöма кык сюрс сайö выль кыв да кывйитлöс. Нимыс сылöн «Мутвундынам пойдарена: у мут-влак мутер» (Кывворнымöс сöвмöдам: выль кывъяса кывкуд). А мыйысь мыжмисны «Выль кыввор» дасьтысьяс? Выльторсö öктöмысь? Небöг лэдзöмысь? Али лыддьысьысьöс тöдмöдны зiльöмсьыс?
   Серам петтöдз чуйман, кыдзи филолог вермö вежньöдлыны выль кывъяслысь юкöнъяссö. Весиг школаын велöдчысь висьталас: вежлöг кыв артмöма абу веж да лöг кыввужъясысь, а вежлавны кыввужысь -öг суффикс отсöгöн. (А кыдзи эськö юкас ассьыс либö гöтырыслысь овсö О.Уляшев, быть нин сэтысь шева кыввуж аддзас).
   Уна выльтор позьö артмöдны и -тас суффикс отсöгöн; йöз сёрниын и гижöд кывйын эмöсь изьватас, мутас, гöгöртас, рудовтас торъякывъяс. Сiдзкö, и уджтас кывйыс бура лöсялö да шогмö «программа» вежöртасын. О.Уляшев дзик сорлалöмöн юкö кывсö удж да тас юкöнъяс вылö, уджыслы пö лоö тас, пом. Вылыс Эжва вылын олысьяс, Уляшов ног кö чайтны, нимтöмаöсь ассьыныс котырсö Эжватас нимöн сы могысь, медым висьтавны, сэтчöс йöзыслы пö пом лоö ли мый?   
   Збыльтор шуö О.Уляшев: кыв-вор тöдса комилы сёрнитан сям, сёрнитны кужöм вежöртасын. Сэк жö сылысь юкöнъяссö öтлаын гижöмыс сетö позянлун вежны кывлысь вежöртассö. Позьö чайтны, «лексика» вежöртасын кыввор ― лöсьыда артмöмъяс лыдын. (Колана мында кыввортöгыд он на и варовит!) Татшöм тшöтш йитöдыс и öтлаын гижана войтöв «судорога» да вой тöв «северный ветер» костын. Кужöмöн тэчöма да бура шогмöма и, шуам, ловбус, ваюксянiн, ловру, кыпыдавны, медшöртор, чунöк (босьтöма И.Г.Торопов гижöдъясысь), кыка, лигыш, лёквыв, öдйöа, шöрöвыйöасьны (Г.А.Юшковлöн), лымань, эсканпас (И.И.Размановлöн), ылдöс, йиджтас, чутiк-гаг (В.Тиминлöн) да уна мукöд.
   Зэв нимкодь, мый вöлiны да эмöсь сэтшöм гижысьяс, кыдзи В.Т.Чисталёв, П.Г.Доронин, Я.М. Рочев, Г.А.Юшков, И.Г.Торопов, В.В.Тимин, В.Напалков да мукöд; налысь висьт-романъяссö любö  лыддьыны: сэтшöм мича, сöдз, абу дiлькваян кывйöн гижöма найöс. Мудзлытöг корсьысьöмöн, выль кывъяс тэчöмöн öнiя гижысьяс озырмöдöны кывнымöс да оз лэдзны косьмыны сылы. Öти сайын казьтыштам, мый  В.Тиминлöн «Ракета видзöдö енэжö» небöгын бергалö 100 гöгöр выль кыв да кывйитлöс.
   Позьö сöмын ошкыны и теле- да радиожурналистъясöс ― оз öтдортны коми гижысьяслысь выль кывъяссö да. Öд найö ― гижысьяслысь выльторсö нимöдысьяс да йöз вежöрöдз вайöдысьяс. Оз юасьны мыйлакö О.Уляшевлысь, позьö оз пыртны сёрни-гижöдö выль кывъяссö. Дай оз и ков юасьны, колантор тай сюрöма!
   Ошкана и сiйö, мый коми филологъяс-велöдысьяс оз вунöдны «медбöръя коми лингвистъяслысь» ― В.А. Молодцовлысь, В.И.Лыткинлысь, И.И.Размановлысь кыв терминъяс ― сёрникузя, чута чутiк, кадакыв, эмакыв, уначута, кывбöр, горöдан пас, кывтор да с.в. ― да паськыда вöдитчöны  вузын велöдiгöн. (О.Уляшев  коддьöмъяс лючки тöдтöгныс чайтöны найöс öнiя лöсьöдöмторйöн).
   Оз ков бöбйöдлыны журнал лыддьысьясöс да петкöдлыны абутöм тöдöмлунтö: «Став мирын метро, а миян лоö мупытштуй. Мед ставлöн Конституция, а миян лоö оланподув!»  ― гораа пасйöма статьяын (65 лб.). Збыль вылас дзик мöдтор: венгръяслöн эм метро и földalatti (буретш и эм коми ног – мупытштуй), эстъяслöн метро кывкöд орччöн   maa-lune raudtee  ― мупытшса кöрттуй; венгр кывйын оланподулыс (конституцияыс) шусьö Alkotmány, немеч кывйын  Verfassung, фин кывйын  perustuslaki, эстъяслöн ― латинскöйкöд орччöн эм и артмöдöм кыв ―  põhiseadus да с.в. Англия кывйын бергалö мупытштуй пасйысь некымын ас кыв: öтувъя кывйыс the undergraund, Лондон карса метросö шуöны tube, Америкаса Öтувтчöм Штатъясысь мупытштуйсö нимтöны subway, сöмын москваса метросö пасйöны Metro кывйöн. Уляшевыс йöзсö велöдö кывкудъясöн вöдитчыны, а ачыс сэтчö нырсö абу на сюйлöма. Ганс-Христиан Андерсен мойдын моз пасьтöм корольö пöрöма.
   Гöгöрвоана, öнöдз на коми кывйын абу ставыс лючки-бур. Оз на тырмы кывйöн вöдитчысьяслöн сёрнитан культураыс. Тшöкыда на радио да телевидение пыр сёрнитысьлысь (абу журналистлысь) позьö кывны: поздравляйта пятое мая праздникöн, приведита примеръяс, сочинитöма песняяс да с.в.  Абу ставыс шыльыд-мольыд и выль кывъяс тэчöмын, абу став вöзйöмторйыс лючки. Шуам, позьö öти кывйö О.Уляшевкöд воны ямкерка кыв кузя. “Выль кывворö” öктöмъяс пöвстысь, дерт жö, оз ставыс мусмы коми войтырлы, оз ставыс вужъясь гижöд кывйö. Век жö нимкодь, мый буретш “вакомистъяс” ― кывсö збыльысь радейтысьяс ― уна вын пуктöны сы могысь, медым кывным дыр на олiс-вылiс. Найö гöгöрвоöны, мый коми кывйыс ― абу öти мортлöн, абу öти грезд (да градйöр) гöгöрса сёрни. И кöть кодсюрö омöльтö да вöйпö налысь зiльöмсö, чайтам, найö оз усьны ловнас да коми  кывсö кутасны водзö сöвмöдны да выльмöдны.

0

37

Коми кыв йылысь Уляшевöн вöчалöм дзугъяс видлалöм бöрын быть колö шуны кыв и сылöн гижанног йылысь. Збыльысь, татшöм тешитчана-вышитчана гижöдсö ме коминад некытысь эг на лыддьывлы. Медводз, унаысь О.Уляшев кодöскö велöдö, видö, удтö, дивитö, мыжалö, налы вылiсянь индалiг. Сöмын кодлы быттьö? Тöдöмысь, выль кывъяс лöсьöдысьяслы да сыöн вöдитчысьялы: «Выль кыввор» чукöртысьяслы, термино-орфографическöй комиссияын зiльысьяслы,  быд гижысь-журналистлы, кодi лысьтöма шуны мыйкö выль ног, вöвлытöм на кыв пыртны. Татшöм коми йöзсö О.Уляшев кыдз сöмын абу нимталöма, со кöть, Эз казявны выль кыв тшупысьяс, мый… (63 лб.); Орöм вужъяыдлы, дерт, тыдалöджык, мый коми кывсьыс кодзны-киритны (65 лб.); Но öд уджö босьтчисны [b]зiль да ловъя кыв тöдöмöн дзескöдтöм йöз[/b] (65 лб.); Видзöдöмапöрйö, кывтшупысьяслöн мöдтор вылö морттуй оз тырмы, а водзмöстчыны-кыпöдчыны кöсйöмыс ыджыд (66 лб.); Оз узьны кыв сузлялысьяс. Ок, оз узьны (66 лб.). Татшöм «мича кывъясöн» Уляшев «нимöдö» кыв комиссияын зiльысь В.Тиминöс, Г.Беляевöс, Г.Юшковöс (вöвлöм членъясöс), З.Прошеваöс, З.Пантелееваöс, С.Козулинаöс, миянöс да уна мукöдöс. Уна лыддьысьысь, гашкö, оз и эскы, мый аслас уджъёртъяс йылысь, коми интеллигенция йылысь тадзи гижö коми морт, филологияса кандидат. Гижö тай со Уляшевыд, посни челядь моз нимтчöмнас нелямын арöсысь петöм айлов зiльö уськöдны выль кыввор сöвмöмсö. Ёна пиньсö кеслö «Выль кыввор» небöг вылö Уляшевыд миян: Видзöдан да, колана книгасö дас воясöн оз лэдзны, а некытчö шогмытöм коми кыв виан кывворъяс вылö кыськö и деньга сюрö, и кад корсьöны… (67 лб.). Некутшöм логика весигтö аслас кывъясас сылöн абу: кыдзи нö выль материал, выль кыв да кывтэчас артмöдысьяс вермасны кывсö бырöдны, кымын коми кыв нö бырöдiс 1700 выль юркывъя кывкудным? И тадзи гижö коми мортöн гораа асьсö нимтысь фольклорист, ас коми войтырöс лякö,  ассьыс морт нимсö уськöдiг. Содтам та дорö: некод миян пиысь оз падмöд О.Уляшевöс гижны да йöзöдны ассьыс колана небöгъяссö. Йöзсö суклялöм дорысь мед бурджык гижис нин кутшöмкö гырысьджык удж, öд сы ов улын комиöн кывчукöр ни велöдчан небöг, фольклор йывсьыс монография ни небöгтор тай эз на тай петавлы.   
   О.Уляшев серти, выль кыввор чужтысь-кыпöдысьясыс вöлöмкö, комиöн оз сёрнитны, чужан кывсö пö оз тöдны да. Со кыдз сiйö гижö: Олöма йöзлысь, сиктсалысь колö кывзыны да велöдчыны комиöн сёрнитны (64 лб.); Языковедлы колö эськö бура тöдны словаръястö (сiйö öд и эм няньыс), но выль кывъяс лöсьöдлiгад кадыс та вылö, тыдалö, оз коль (64 лб.); Позьö-ö коми кыв тöдысьöн шуны мортöс, кодi челядьлы вöзйö «вежлöг – падеж», «сёрникузя – предложение» терминъяс? (65 лб.);  Но öд уджö босьтчисны зiль да ловъя кыв тöдöмöн дзескöдтöм йöз. Кызвыныс Микайлö-аркангелöдз комиöн шы эз сетлыны, важöн коми олöмысь да ловъя вужйысь орлiсны (65 лб.). Этатшöм кывъясыс сылöн дзик сöрöм нин: термино-орфографическöй комиссияö пырысьясыс öтитöг сиктъясын чужлöм коми йöз, гижöны да сёрнитöны комиöн, комиссияса чукöртчöмъяссö 11 во нин нуöдам сöмын комиöн. Уляшев ногöн, Владим Тиминлы колö мунны Паджга сиктö велöдчыны комиöн сёрнитны, сы могöн жö колö М.Елькинлы бöр кайны Сёськаö, Светлана Козулиналы мунны изьва ногöн сёрниö велавны Печора вылö? Водзö О.Уляшев гижö дзик нин немсö:  Медбöръя коми лингвистъяс кувсисны кöкъямысдасöд-öкмысдасöд воясö (65 лб.). Эн эскы таö, лыддьысьысь, коми кывтуялысьясысь унаöн на тала югыдас олам-уджалам: пенсия вылынöсь Т.И.Жилина да Колегова, выль кывкудъяс гижö филологияысь доктор А.Н.Ракин, Сибырын öнi уджалö филологияса доктор Е.А.Игушев, ловъяöсь на О.Уляшевöс СКУ-ын коми кывйö велöдысьяс А.Н.Карманова да В.М.Лудыкова, фин-угор факультетысь декан М.С.Федина да уна мукöд. Уляшевыс ачыс пукалö 505 кабинетын, а сы öдзöсыслы воча видзöдö 523 кабинет. Сэнi пукалö да мыйкö гижö ловъя коми лингвист Г.В.Федюнева, код кипод улын вöлi дасьтöма став кывтуялан öнiя коми терминологияыс. Быдмöны и том кыв туялысьяс, дасьтöны выль гырысь уджъяс. Водз на коми лингвистъяссö мöдар югыдсьыс чайтан, Олег. Ог на ми сэнi узьöй. Ок, ог узьöй! Но мыйла Уляшевыс татшöм абутöмторъяссö гижö?
   Видлалана гижöдысь яръюгыда тыдовтчö авторыслöн и асьсö кутны кужтöмлуныс ― либö научнöй этикет ― тырмытöмлуныс. Сöмын этш тöдтöмъяс да акпаш йöз вермöны вöйпны-омöльтны уджъёртясöс да увтыртны туясьöмын шедöдöмторъяссö. Тайö аслас гижöднас О.Уляшев бура петкöдлö, кыдзи оз позь гижны-донъявны туялан уджъяс.

0

38

Абу Кочпон, а Кöджпом

Кольöм 2009 восö вöлi шуöма Коми кывлöн воöн. Со и кöсъя юксьыштны аслам мöвпъясöн, кутшöмджык вежсьöмъяс лоисны та боксянь.

Паськыда пасйисны Иван Куратовлöн чужöмсянь 170 во. Каррайоньясын вöлiны коми войтырлöн быд вося чукöртчылöмъяс. Газетьяслöн лист бокьясын водзö мунiс выль кывьясöн вöдитчöм йылысь вензяна сёрни. Кöть эськö кодсюрö шуö, мый выль кывьяссö чунь помысь нёнялöмаöсь. Но ме талы паныд. Учёнöйяс вöчöны зэв колана да ыджыд удж сы кузя, мед водзö сöвмис да озырмис кадыслы лöсялана коми кыв. Вермам öд воны сэтчöдз, кыдзи нёль арöса нывка öшинь увсьыс аддзöма вöлöс да чуньнас петкöдлö мамыслы:

-Мамö, тонö локтöма ыджыд кысöйыс.

Водзтiджык нывкаыс вöвтö абу аддзылöма, а каньыд пыр гортас. Тайö вöвлöмторсö меным висьталiс гöтырлöн воча нылыс аслас быдмысь кагаыслöн сёрниысь. Сiдз нин рочмыны кутiм да кыдз нö огö рочмöй. Сиктысь Сыктывкарö локтасны том коми йöз да пыр и аддзöны, мый карса улич вылын коми руыс оз петкодчы. Сöмын улича нимсö гижöма коми ногöн.

Ме ачым велöдчылi Немдiнса школаын. Сiйö кадас öти классын пукавлi немечьяскöд, литовечьяскöд, белорусъяскöд. Ставныс зэв бура сёрнитiсны комиöн, кöть олiсны найö Усть-Нем База посёлокын.

Абу сьöлöм серти и Кöджпомса шойна вылö пыранiнын гижöдыс. Позьö öмöй гижны «Кочпонское кладбище»? Тайö шойнаыс карса. Но сэнi олысьяс некор эз нимтывны тайö вежа местасö «Кочпонöн». Важöн коми йöз ин нимъяссö шулiсны стöча: «Кöджувдор», «Кöджмöдар», «Кöджпом». Ме ногöн, тайö кывъя инсö стöча гöгöрвоöны коми войтыр. Чуймöдö и сiйö, кытысь босьтöмаöсь «Кируль» нимсö. Зэв бура тöда Сыктывкарсö. Важысянь сiйö инсö вöлi шуöны «кырув», «кырувса». А некымын во сайын лоис «Кирульский рынок». Сiдзжö гугöдöмаöсь коми кывсö.

Дыр мöвпалi и Выльгорт сиктса туй бокысь «Еляты» гижöд вылын. Тайö нимас вунöдöмаöсь «е» шыпас вылас пуктыны кык чут. Oд сиктгорувса тыас усьö либö петö тысьыс ёль (ёляты). Со и кöсъя юавны: кодi Сыктывкарын кывкутö уличьяс вылын реклама да мукöд гижöд вöсна.

Кутшöм сöмын гижöдъяс сэтысь он аддзы. Код тöдас, кодi найöс вöзйöма да кутшöм кыв вылын серпасалöма. И веськыда кö шуны, збыльысь оз тöдчы, мый Сыктывкар - коми войтырлöн юркар. Эм миян Коми наука шöринын Кыв, литература да история институт, эмöсь национальнöй политика да культура министерствояс. Налы эськö и кывкутны тайö удж вöснаыс. Но гöгöрвоöны оз коми кывсö? Ог нин юав, кужöны оз сёрнитны коминас сэтчöс войтырыс? Зосима Васильевич Панев «Крутые виражи» небöгын казьтылö аддзысьлöмсö Москваын

Владимир Никонович Старовскийкöд, кодi чужлiс Помöсдiнын, 35 во сайö веськöдлiс СССР-са статистика управлениеöн да бура тöдiс чужан кыв, сёрнитiс сöстöм коми кывйöн.

Сiдзжö «Родники пармы-90» небöгын вайöдöма Виктор Савинлысь РКП(б) ЦК-ö шыöдчöм-вöзйöм сы кузя, мый Коми обкомса секретарь Чирковлы колö велöдны да тöдны коми кыв. Тайö вöлöма 1922 воö. Абу повзьылöма Савиныд шуны ассьыс кывсö ыджыд чиналы веськыда синмас, кор ачыс редакторалiс да лэдзис «Югыд туй» газет.

Зэв подулалöмöн петавлöны «Коми му» газетын Евгений Цыпановлöн гижöдъяс. Сiдз, декабрын «Абу варов, а сьылысь» гижöдын вöзйö, мед

Коми радиоын пыр ёнджыка юргис ловъя коми сёрниыс. Чайта, Евгений Александрович ёна тöждысьö чужан кыв сöвмöдöм вöсна да уна вöчö та могысь.

«Коми Республикаса государственнöй кывъяс йылысь» оланпас збыльмöдан, коми кыв видзан да сöвмöдан программаын вöлi индöма гижны кар, сиктгрезд, улича, изэрд, учреждение, лавка нимъяс, туйвывса пасъяс комиöн да рочöн. Тайö уджтас вылас урчитiсны видзны 2 миллион шайт. Но помöдз шуöмсö абу на вайöдöма. Оз тыдавны сиктъяслöн, грездъяслöн туйвежъясын коми нимъясыс. А öд кыдзи öнi артмö? Зэв сьöкыд гöгöрвоны посёлок нимъяс роч кыв вылын. Босьтам «Чиньяворык» посёлок. Кыдзи нимыс артмöма? А коминас вöлöм шусьö «Чимиавöрöк», стöчмöдны кö, «сьöмга (чими) кульман ю».

Менам чайтöм серти, веськыд сёрнисö колö эськö гижны «Коми му» газетын ас сёрнисикас вылын, но скобкаö босьтöмöн стöчмöдны литературнöй кывйöн, сэки эськö нöшта на бурджыка гöгöрвоасны изьватас, удораса, абъячойса да мукöд войтыр коми кывлысь озырлунсö.

«Коми му» газетын йöзöдлöны юржугланторъяс. Найöс колö водзö сетны. На отсöгöн позьö бурджыка тöдмасьны коми кывйöн. Бöркыв пыдди вöзъя «Коми му» газетлысь тираж содтöм могысь вöчны тайöс жö землячествояс пыр. Сыктывкарын уджалö уна районса землячество. Найö ыджыд отсöг жö вермасны сетны.

Иван ПОПОВ,
КОМИ МУ

0

39

Абу варов, а сьылысь

Бöръя воясö республикаса олысьяс вермöны кывзыны «Коми йöзкостса радио», и тайö зэв бур. Позьö шуны, торъя коми радиоканал лои. Луннас, рытнас да асывнас позьö кывзыны ас кывъя уджтасъяс да сьыланъяс. Торйöн нин кивыв тайöс вöчны шойччан лунъясö, сэки öд «Коми горын» ни «Юрганын» коми горыс мыйлакö оз юргы, öткымын дженьыдик уджтасысь кындзи. Чайтöны, коми йöзыслы сэки ас кывъя уджтасъясыс оз ковны. И бур, мый позьö öнi кывзыны коми сьыланъяс, нимкодясьны мича шыладöн да сьылысьяслöн мыла горöн.

Сöмын колö эськö, мед татшöм радиоыс кылiс быдлаын республика пасьтала, а эз сöмын сутуга пыр паськалан радиовезйöд разав. Мед кывзыны позис тшöтш туйын, вöр-ваö петалiг, ывлаын шойччиг-уджалiг. Мыйлакö весиг Перым-Коми кытшын ас кывья радиоыс паськалö РМ радиогыясöд, а миян збыльысь озыр республиканым тайöс вöчны оз вермы. Марий Эл республикаын асланыс радиоканал уджалö РМ гыясöд жö.

Миян радиоканалын зiльöны том йöз. Уджтас нуöдысьясыс кызвыннас тöрытья студентьяс, найö зiльöны ышöдны миянöс кывзыны налысь уджтасьяссö. Ошкöны асьнысö тадзи: «Коми йöзкостса радио — медся варов радио». Тайöс кывзынысö, дерт, нимкодь, сöмын таö он на ёна эскы, öд буретш варовлуныс оз зэв тыдав. Сёрнитан уджтасъясыс зэв дженьыдöсь (3-4 минут кымын) да сёрни кывзöмас он на и ёнасö ылав. Бурджык ошкыны асьнысö мöд ног — медся сьылысь радио.

И збыль: унджык кадсö юргöны коми сьыланкывь-яс. Дерт, тайö зэв бур. Сöмын окота эськö и тырвыйö бура дасьтöм да кузьджык уджтасъяс кывзыны, шуам, сiйö жö сьылысьяскöд да шылад тэчысьяскöд сёрнияс. Содта татчö öтитор: кызвын сьыланкыв водзвылас некутшöм юöр абу ни сьылысь, ни сьыланкыв гижысь йывсьыс. Дерт, найöс пыдди пуктöм вöсна нин колö сетны колана юöръяссö, öд бöръя каднас енбиа мыйта выль том морт петкöдчис, и найöс колö тшöтш нимöдны. Ог нин индывлöй сöмын Лидия Логинова вылö. Выль коми кодзувъяссö колö öзтыны!

Йöзкостса радиосалы варовлунсö колö, ме серти, ёна содтыны, подулавны культура, политика, спорт, вöралöм, чери кыйöм, йöзöс велöдöм да туялöм йылысь уджтасъяс. Тöдса öд: «Коми гор» радиоын комиöн сёрнитан кадыс ёна этшаджык, а рытъяснас чужан кыв вылас радиостанцияыс оз нин горав. Сöмын, дерт, та могысь колö ёна содтыны каналын уджалысь лыдсö. Медым эз сёрнитчан пыр кодöссюрö юасьны, а ветлiсны районъястi, корлiсны гижавны уджтасъяссö лючки студияö. Тайö могсö олöмö пöртöм вылас, дерт, колö вель уна сьöм. Чайта, республикаса веськöдлан котырлы колö оз сöмын «Белкомуръяс» вöсна «висьны», а медводз вужвойтыр вöсна тöждысьны.

Торйöн окота пасйыштны «медся варов радиоса» коми кыв йылысь. Юргö миянлы талунъя кыв, журналистъяс кыдзи вермöны зiльöны пöльыштны асланыс уджтасъясас öнiя кадся выль ру: пыртöны вылькывъяс(изэрд, каналан, оланпас да с.в.), зiльöны лöсьöдны аслыссикас кывтэчасъяс. Сöмын майшöдлö кыктор: öти-кö, том йöзыс сёрнитöны вывтi нин тэрыба, ньылалыштöны кыв помъяссö, весигтö корсюрö сьöкыд гöгöрвоны шуöмторсö. Мöд-кö, юöр сетысьяс тшöкыда кывйысь кывйö вуджöдöны роч кывйысь зумыд кывтэчасъяссö сiдзи, мый найö оз лöсявны коми кывлöн оланпасъяслы, пытшкöсса вежöрыслы. Шуам, тшöкыда кывлам «Кольччöй миянкöд!» шуöм. Коми мортыд тайöс гöгöрвоас дзик веськыда - колö радиоас пырны, воны котöрöн редакцияас да сэтчöс йöзыскöд кольччыны öти вежöсас. Гöгöрвоана öд: тайö рочысь «Оставайтесь с нами!» шуöмсö комиöдöм. Ёна комиöнджыка эськö юргö вежöртас сертиыс мöд ног вуджöдöм - «Водзö кывзöй миянöс!»

Сэсся вель уна босьтöм кыв пыдди позьö öд аддзыны коми весьтасъяс. Шуам, уджтас нуöдысьяс быд асыв сиöны кывзысьяслы «бур настроение». Бöръя кыв пыддиыс позьö вöдитчыны «аскылöм» да «ловру» кывъясöн.

Oнiя кадлы зэв лöсяланатор - юöртны йöзыслы водзö лоанаторъяссö гороскоп серти, öд унаöн эскöны кодзувъяслы да пельсö чошкöдöмöн кывзöны асланыс енэжпас серти лöсяланаторъяссö. Ме эськö талы ог эскы да ог и кывзы, но пельыд век крукасьö рочöн сетан енэжпас нимъясас (дева, весы, рыбы, овен да с.в.). Дзик тадзи жö, роч ногöн, гороскопъяссö йöзöдö и «Йöлöга» газет. Чайта, тадзи вöчны оз ков, öд и рочас тайö енэжпасъясыслысь нимъяссö тшöтш вуджöдöма асыввыв кывъясысь. Синтö кö чöвтан англия, немеч, суоми, мари, удмурт, эст кывъя газет-журналъясö да кывзыштан тайö кывъяса радио, пыр жö и казялан дзик мöд серпас - сэнi став енэжпассö сетöны ас кывнас, сiйöс тадзи пыдди пуктöмöн. Видлöг вылö позьö вайöдны асыввыв гороскопысь енэжпас нимъяссö роч, суоми, удмурт да коми кывйöн.

Бöръяяссö ассянь вöзъя пыртöдны «Коми йöзкостса радиоö», мед быд кывзысь аддзас чужан кывйыслысь позянлунъяссö. А сiдзжö сиа том журналистъяслы коми  кыв сöвмöдан да паськöдан уджын водзö гырысь вермöмъяс.

ЦЫПАНОВ Йoлгинь,
КОМИ МУ

____________________________________________
          - "Коми народнöй" эськö радио да коми народыс ciйöс оз кывлы-а.

0

40

Мыйoн озыр коми кывным?

Коми йöзлы коми кывйыс дона медводз кыдзи чужан кыв ай-мамсянь тöдмалöм сёрни. Кывйыскöд йитчöма шуда челядьдыр, ворсöмъяс, мойд кывзöм, школаын медводдза шыпасъяс гижöм, ас чужан фольклорöн да литератураöн тöдмасьöм, водзö быдмöм-верстяммöм. Мортыс бура тöдмалö чужан кывсö буретш дас арöсöдз да сэсся сöвмöдö ассьыс сёрнитан-гижан сямсö олöм чöжыс. Позьö шуны, чужан кывйыс пыдöстöм юкмöс, сэтысь позьö век аддзыны выльтор, буртор, шензьöданатор, водзынджык уна казявтöмтор.

Комиöн Россияын 2001-öд воын гижсьöма 293.406 комизыряна да 125.235 перым-коми, ставыс 419.641 морт. Тайö абу этша, кöть 1989-öд вося перепись серти комиыс вöлöма матö 65 сюрс вылö унджык. Коми йöзыс овмöдчöмаöсь зэв паськыда да сёрнитöны 20 диалектöн, на пиысь дас сёрнисикасыс коми-зыряналöн, кöкъямысыс перым-комилöн, эм зэв торъялана язьва-коми диа-лект да камайывса сёрнисикас. Коми сёрнисикасъясыс зэв озырöсь да уна пöлöсöсь, быдöнлöн эм аслас торъялана чужöмбан.

Кымын кыв бергалö коми сёрнисикасъясын? Та вылö вочавидзнысö быттьöкö и кокни, öд кывкудъясö кыв лыдсö пасйöма стöча. Венгрияын, Будапешт карын 1959-öд воö Давид Фокош-Фукс лэдзöма «Syrjanisches Worterbuch" (Коми кывöктöд) небöг, сэнi 1.464 лист бокö тöрöдöма 20 сюрс торъя кыв. 1961-öд воö Сыктывкарын вöлi лэдзöма «Сравнительный словарь коми-зырянских диалектов» нима кывкуд (дасьтысьясыс Т.И.Жилина, М.А.Сахарова, В.А.Сорвачева), сэтчö пыртöма 25.000 кыв. Кыв, литература да история институтын öнiя выль сёрнисикас, кывчукöр лöсьöдысьяс серти, чукöрмöма нин 87.000 торъя кыв. Выль ыджыд кывчукöрыс дась нин, сöмын бöръя некымын воöн республикаын некыдзи сьöмыс оз сюр сiйöс йöзöднысö. А вот 1985-öд вося «Коми орфографическöй словарь» небöгö чукöртöма 13.000 кыв, абу уна. Бöръя 2000-öд вося «Комироч кывчукöрö» коми гижöд кывйысь пасйöма 31.000 лексема. Но тайö лыдпасыс век ичöт и лоö тырмытöм, öд кывкудъясö став кывворыс тырвыйöсö некор оз веськавлы. Сэк жö кывйын век артмалöны неологизмъяс (вылькывъяс), торйöн нин öнiя кадö. Та понда сетöм юалöм вылас вочавидзнысö öттшöтш зэв сьöкыд.

Коми сёрникузяясын зэв бура кольöма кывлöн аслыспöлöслуныс, важысянь öкмöм озырлуныс. Рочьяскöд волысьтöдз комиын бергалöма зэв уна ас кыв, кодъясöс сэсся уна сёрнисикасын да гижöд кывйын сёрöнджык вежисны рочысь пырöмторъяс. Вайöдам некымын видлöг: унджык сёрнисикасын шуöны крест, а изьва сёрниын кольöма перна. Матö быдлаын нин кывйö пырöма седлö кыв, а лузалеткаса сернисикасын юрго öныр, двойни, звöнни шуöны унджыклаас, а сыктывшöрса сернисикасын эм кыка кыв, кöсяк да кльöшши пыдди Удораын шуасны бель да кес. Удмурт кывйын тшöтш кольöма кес важ кывйыс. Сiдзкö, важ комияслöн овмöсыс войдöр вöлöма вель сöвмöм. И тайö озырлуныс кольöма кывйö, йöз сёрниö.

Но кывйыс оз сöмын видз важсö, ловъя да сöвмысь кывйын век артмалöны выль кывъяс. Кытысь найö воöны, кыдзи артмалöны?

Мукöдын моз коми да удмурт кывъясын öдйö содö торъя кыв лыдыс. Онiя вежласьысь кадыс вайö уна кыв рочысь да роч пыр мукöд кывйысь, шуам кöть, принтер, офис, дума, спикер, мобильник, флешка, ОМОН. Татшöм кывворыс пырö кывъясö вежсьытöг нин, оз аскодясь, öд талунъя перым войтыр тöдöны кык кыв. Мöдласянь, гижöд кывъясын бöръя 15 кымын во чöж артмисны-чужисны вылькывъяснеологизмъяс ас кыв подув вылын, найö кызвыннас бергалöны босьтöм кывъяс пыдди да напы синоним туйын, шуам, оланпас «закон», енби «талант», инпас «адрес», ловру «настроение». Коми-зыряна гижöд кывйын татшöм выль кывворыс 2.000 лексема да кывтэчас гöгöр, удмурт выль кывворсö лыд серти абу на эрдöдöма, перымкоми гижöд кывйын выль кывйыс медэтша. Татшöмторсö во кызь сайын некод эз чайтлы лоны, мöвпалöны вöлi, мый перым гижöд кывъяс оз вежсьыны, öти тшупöдын олöны. Уна кыв пондiс бергавны паськыда да зумыда пырис сёрниö, но унджык вылькывйыс кольö вöзйöмтор пыдди на. Шуам, комиын енби «тапант» кыв пырис, а канму «государство» бергалö вель шоча на. Мый öткодьыс татшöм вежсьöмас перым гижöд кывъясын?

Татшöм зiльöмыс чужис öти кадö да öткодь помкаяс вöсна. Кольöм нэмса 80-öд воясö выльмöдан кадö лои позянлун восьсöн сёрнитны тшöтш коми кывйын чöжсьöм тырмытöмторъяс йылысь. Кыдзи вöвлöм Сöвет Oтувлунын мукöд кывъясын, медшöр тырмытöмтор пыдди индывлiсны медводз кыввор да терминология лёка сöвмöм вылö да напöн вывтi нин рочмöм вылö. Та йылысь торйöн уна висьталöма вöлi научно-практическöй конференцияяс дырйи сёрнитысьясон, сэки унаон ышодюны паськöдны-сöвмöдны медводз кыввор. Сiйö кадсяньыс туялысьяс да гижысьяс пондiсны корсьны выль кывворлысь öшмöсъяс.

Медводз кыв бурмöдысьяс корсялiсны ас кывйысь вöвлöм нин кыввор: сёрнисикасъясысь, важ кабалаясысь, сёрнитан кывйысь, шуам, небöг, кöлысь, каналан, кöртым «аренда». Сöмын регыд лои гöгöрвоана, мый зэв уна пасъянторлы татшöмсяма кывворыс абу. Петан туйыс лои öти - лöсьöдавны вöвлытöм на вылькывъяс. Коми кывйын тадзи артмисны оланпас «закон» да оланподув «конституция» кывъяс, удмурт кывйын кункрезь «канму кып», а сiдзжö уна мукöд. Торйöн нин зiля вылькывъяс артмöдалiсны 90-öд воясö, Комиын вель зiля сэки уджапiс кыв комиссия. Вочасöн татшöм зiльöмыс сэсся кутiс кусны, öнi татшöм комиссияыс тырбура некымын во оз нин уджав. Выль кывворсö лои чукöртöма Коми Республикаын нёль юöр гижöдö (бюллетеньö) да нёль торъя кывкудйö (дзоньнас кык сюрс гöгöр вылькыв да кывтэчас). Коми-зыряна вылькывъяссö Кыв, литература да история институтын лои чукöртöма компьютер кудйö. Найöс вöлi вöзйöма газет-журнал редакцияясö, вылыс велöдчанiнъясö. Таысь кындзи, уна материал сетöма газет-журналъясын. Перым-коми кытшын вылькыв чукöртан уджыс эз и пансьывлы, та понда сьöкыд шуны, уна-ö вылькыв вöлi вöзйöма. Но вочасöн и сэнi кывворыс паськапö, вель уна торъякыв найö босьтöны миян гижöд кывйысь (сэнi найöс шуöны зырянизммез), шуам кöть, небöг, кывкуд, сёрникузя.

Выльысь пыртана кывворсö юöртантор темаяс серти позьö юкны куим ыджыд юкöн вылö: 1) йöзкотыр да политикакöд йитчöм кывъяс, шуам, юрапысьпу, ёрд, канму, оланподув, индöдтшöктöм; 2) туялан терминъяс (кызвынсö филологияысь), шуам, кыввор «лексика», шыкуд «фонетика», кывберд «прилагательнöй»; 3) культура, наука, йöзöс велöдан адасъясысь, абстракцияа кыввор: шылад «музыка», сикасалöм «классификация», енбиа «тапанта», öтуввез «Интернет», помтшупöд «предел, финиш» да с.в. Эм, дерт, мукöд, посньыдджык сикасъяс на, шуам, вичко да эскöмкöд йитчöм кывъяс: енвый «миро», пуйöр «сад», винатусяпу «виноград пу».

Кыв артмöдöм серти кö видзöдлыны, вылькывъяс артмöны öткодя, медся паськыдасö суффиксъяс отсöгöн да юкöнъяс содтöмöн, копуляция туйöд. Видлöгъяс: кокньöд «лёгота» (артмöма кокни кывбердысь - öд суффиксöн), шылад «музыка». Торъяланторъясысь позьö пасйыны коми кывйын чинталöм кывъяс (аббревиатураяс) артмöм, шуам, СКУ - Сыктывкарса канму университет, КМ - «Коми му» газет, ВАК - восьса акционер котыр, ПАК - пöдса акционер котыр, НАК - Ненеч автономия кытш. Татшöм кывйыс кöть абу уна, сöмын роч аббревиатураясысь мынтöдчöмыс унатор йылысь нин висьталö.

Выль кыввор артмöдöмпаськöдöмын зэв тöдчанатор - кыв реформаторъяс, сiйöс сöвмöдысьяс, выльтор аддзысьяс, сiйöс вöзйысьяс да пыртысьяс. Татшöм йöзыс перым муясын этша, тайö ичöт лыда туялысьяс, велöдысьяс, кыв радейтысьяс. Медтöдчанаыс, медым найöс кылiсны журналистьяс, школаса велöдысьяс, редакторъяс. Шуам, Комиын уна вылькыв вöзйис Сергей Епфимов, Перым карын олысь Oньö Лав (В.А.Степанов) лöсьöдлö кывъяс кыкнан коми гижöд кывйö. Дерт, збыльысьсö öнiя кадö, кöть абу нин коммунист ютырлöн коркöя личкöмыс, кывйöн вöдитчан нырвизьсö урчитöны редакторъяс. Кыв выльмöдöмыс кызвынсö на сайын. Комиын медся бура видзöдöны выль кыввор вылö радиоын да «Коми гор» телекомпанияын уджалысь войтыр. Галина Вениаминовна Ведерникова тшöкыда сёрнитлö та йылысь аслас радиоуджтасъясын. Шензьöдö, Коми Республикаынпетысь томуловлы индöм «Йöлöга» газет мыйлакö öтдортчö уна бур да мича вылькывйысь.

Выль кыввор первойсяньыс сьöкыда пырис гижöд кывъясö. Помкаыс тапы уна: кывйöн вöдитчан консерватизм, кыввор тöдтöмлун, корсюрö найöс омöля гöгöрвоöм. Зэв тöдчана помкаöн вöлi сiйö, мый вöзъяна-пыртöдана кывйыс öтпырйö кутлiс бергавны вывтi уна. Сöмын олöмыс петкöдлiс öтитор: мыйöн ёнджыка вензисны да сёрнитiсны выль кыввор йылысь газет-журналын, мыйöн ёнджыка видiсны-лёкöдiсны сiйöс, сымын бурджыка сiйö пырис. Сiдзкö, антиреформаторъяслöн зiльöмыс мунiс кутшöмакö бур вылö. Шуам, Коми Республикаын медся яра лёкöдöны вöлi выль кывворсö öткымын гижысь, журналист да филолог. Медся ёна оз во сьöлöм выланыс выль кывворыс олöма нин да пöрысь йöзлы, кызвынсö сиктын олысьяслы, а медкокниа пыртöны сёрни-гижöдö найöс томулов, школаын велöдысьяс, студентъяс, водзмöстчысь журналистьяс. Социолингвистика боксянь тайö темасö - вылькывъяслысь вужъясянногсö - абу на бура туялöма, неважöн петiсны та йылысь коми кыв туялысьяслöн медводдза небöгъяс (авторъясыс Л.М.Безносикова, Е.А.Айбабина, Т.А.Гудырева).

Мый бурсö вайис нин выль кыввор вöзйöм-пыртöмыс? Тайöс позьö лыддьöдлыны торйöн. 1) Вель ёна паськалiс ачыс кывворыс, лои ловзьöдöма тшöтш кывартмöдан да нимтан-пасъян ресурсъяс, торйöн нин тайö бура тыдалö 60-70-öд воясся дудöм кывъя газет-журналъяс талунъя синмöн видлалiгöн. 2) Водзö сöвмис-паськапiсны удмурт да коми кывъясын терминология инасъяс, кöть и тайö артмис этша адасын, кызвынсö йöзкостса-политикаа да кыв, литература туялан адасъясын. 3) Кыввор синонимияын да стиль серти кыв юкласьöмын ёна паськапiсны позянлунъясыс. 4) Пырана да бергапана выль кывворыс бур ногöн тöдчö кыввежöр вылö да кутшöмакö кыпöдö войтырлысь асвежöртöмсö, торйöн нин томуловлысь. Унатор ас кывйöн пасйöмыс петкöдлö чужан кывъяслысь винёвлунсö, сöвмыны ыджыд позянлунсö да напысь пытшкöсса вынсö, торйöн нин öнiя öдйö вежласьысь олöмын. Та йылысь висьтапöны коми да удмурт студентьяс пöвстын нуöдöм юасьöмъяс.

*   *   *

Неыджыд кывкöртöд пыдди позяс шуны, мый перым кывъяслöн динамикаыс öнiя кадö тыдалö кык пöлöс вежсьöмъясысь: öти-кö, сёрнисикасъяс да дасьтытöм, нормаö кутчысьтöм сёрнитан кыв öтарö рочмö, воштö ассьыс чужöмбансö, имитö ас пытшкас век унджык босьтöм кыв да кывтэчас, вермö вежсьыны и роч вылö, мöд-кö, перым гижöд кывъяс, нормаö вайöдöм инасъяс сöвмöны мöдара туйöд, озырмöны вылькывъясöн, сёрникузя тэчасыс бергöдчö ас кывъя нормаяслань. Татшöм ногöн, вежсьöмъяслысь медводдза сикассö вермам донъявны кыдзи лёкöс, лöсявтöмöс, мöдсö - кыдзи бурногсаöс. Мый водзö таысь артмас, кыдзи кывйыс вежсяс, петкöдлас кадыс.

ЦЫПАНОВ Йoлгинь.
КОМИ МУ
14.08.2010

0


Вы здесь » Бадьёльйывсаяс - Бадьёльские » Коми кыв. Коми язык. » Новые слова в Коми Языке


Создать форум