Бадьёльйывсаяс - Бадьёльские

Информация о пользователе

Привет, Гость! Войдите или зарегистрируйтесь.


Вы здесь » Бадьёльйывсаяс - Бадьёльские » Вöльдiн - Вольдино » Вольдино. Вычегда


Создать форум

Вольдино. Вычегда

Сообщений 1 страница 2 из 2

1

Вольдино. Вычегда. Переправа.

0

2

УЛЯШЕВЪЯС - ПЫДДИ ПУКТАНА, НИМАЛЫСЬ ЙÖЗ.

   Быд мортлы, кодi пыдди пуктö асьсö да семьясö, колö тöдны, кутшöм вужйысь сiйö петiс. Менам вужъяс ылi Мозын ю йылын. Яренск уездлöн 1646-öд вося писцöвöй книгаö пасйöма, мый Буткан ты дорын, Мозын юсянь дас вит верст пыдынджык, олiс Сысöй Педь Ульян Öнисем пиыскöд, кыйис звер-пöтка да чери. Böлi налöн этшаник мутор да видзтор.
   Бöрынджык Öнисьöмлы Кипрей да Милей пияныскöд окота лоис петны паськыд Мозын вылö. Катiсны да овмöдчисны 1678-öд воын верст ветымынöн вылöджык. Тадзи артмис Вылыс Выльыб грезд. Вöлi ю тыр ком, кебöс, сьöмга, удж да лёль. Ныр уланыс вöчисны муяс да видзьяс, лöсьöдiсны кузь чöс туйяс. Ов да выв, но бара на кыскис выльлаö.
   Катiсны Йирва кузя, кыссисны вöлöкöд сизим верст Ёвва вылö, кывтiсны Емва кузя да бара вöлöкöд петiсны Висер юлöн Öч вож вылö. Öч пармаöд Тиман креж боктi вöвъясöн да мöсъясöн петiсны Вöль ю вылö, Вöль кузя — Эжва вылö да 1707-öд воын овмöдiсны Вöльдiн. 1646 вося писцöвöй книгаын пасйöны Слобожанинъясöн, а 1720-öд воын -Уляшевъясöн. Сысöй Педь Ульянасянь и мунö миян овным — Ульян (Ульяша) — Ульяшев — Уляшев. Висьтала медся нималысьяс йылысь.

ТÖДЫСЬ ПЕТЫР ЕПИМ.
   Медводдза кыв Петыр Епим йылысь. Сiйö вöлöма «местаса кöзяинöн». Вермасьöмаöсь Выльгортса тöдыськöд. Пуö, вöлöм, Епим ю дорын сур, а выльгортса катö пыжöн. «Сусло, стой!» - шуас сiйö. «Сусло кö стой, и, лодка, стой!» -шуас Епим. Пыжыд и сувтас. Епим шулöма: воас пö кад, кор мам кутас мырддьыны нянь кагаыслöн вомысь, кор кутасны лэбавны кöрт лэбачьяс, кор айулов чиннас öткодясяс эньуловкöд. Коркö тшыкöдöмаöсь Епимлысь понсö. Сыысь Епим бöрöн бергöдас тшыкöдысьлысь кöм вöльöссö, и коньöрöйлы ковмöма лунтыр гöгравны вöр керкасö. Корлывлöмаöсь туй Печораö пырысьяс. Кутшöмкö мужик оз пырав корны туйсö да рытнас бöр воас вуджöдчанiнö. Кор да кöнi бергöдчас, ачыс оз тöд. Сöмын Епим дорö пыралöм бöрын вермас мунны кытчö колö. Петыр Епим вöлi бур тöдысь. Сiйö мыждылiс сöмын вывтi ышмысь йöзöс, велöдiс кутны пöрадок. Кулöма Петыр Епим кокниа. Кувтöдзыс «ремеслöсö» сетöма Карп пиыслы, кодi ёнджыка висьтавлiс локтан олöм йылысь, а эз «кöлдуйт». Водзö сы йылысь и висьт.

МАТРОС ЕПИМ КАРП.
   Епим Карп чужлöма 1833-öд воö. Карплöн чужöм бöрас батьыс, Петыр Епим, пуктылöма коз пу, кодi быдмис да сöвмис Карпкöд öттшöтш. Сiйö видзис Уляшевъяслысь вужсö став омöльсьыс.
   Öтчыд вöраланiнсянь Иван вокыскöд гортö локтiгöн уськöдчас ыджыд ош, кодi абу водлöма узьны гуö. Карп койбедьнас вартас ошлы да тшöктас вешйыны бокö. И вöрса зверыд равöстас да пышъяс. Сiйö кадсянь Карпöс кутасны шуны тунöн. Зон мунас служитны сардырся кадö на Кронштадтö. Öтчыд налöн корабльыс, кöнi рулевöйöн вöлi буретш Карп, веськалiс неминучаö. Карплöн батьыс кылас сьöлöмнас, мый пиыскöд мыйкö лоис, да мунас юрбитны ыджыд коз пу дiнö, корас мездыны ассьыс писö лёксьыс. Дас öкмыс во флотын служитöм бöрын Карп воас гортас ловъяöн.
   Карп ветлöма Сибирö - «няня муясö». Ветлiгас велöдчöма лыдьысьны-гижны. Локтiгас сьöрсьыс вайöма ас киöн гижöм молитва книгаяс, на лыдын öти «сьöд книга», кодöс видзöмаöсь жытникын томан сайын. Öти пужъя асылö Карп корсяс сыв места, сэтчö и лэптас керкасö. Быдтöма ныла-пиöс: Ильяöс да Матренöс.
   Гижалöма ывлавыв вежласьöмъяс: ва воссьöм, йи кутöм, лым петöм, пужъялöм да мукöдтор йылысь. Висьтавлöма локтан олöм йылысь: кызьöд нэмын вештасны сарöс да пуксяс выль кад, лоас ыджыд война, кодi босьтас уна йöзлысь олöм. Пöрысьладорыс синтöммöма. Кувсьöма 96 арöсöн Вöльдiнын. Корас прöщайтчыны ассьыс матыссаяссö да сиктса йöзöс, сиас налы став бурсö да тшöктас петны ывлаö: ме пö öнi муна мöдар югыдö.

КЫЙСЬЫСЬ ЕПИМ ЕГОР.
   Епим Егор йылысь уна висьтавлiс сылöн пиыс - Егор Микита, менам ыджыд мамлöн батьыс. Сылöн олöмыс вöлöма зэв сьöкыд, но интереснöй. Быдмылöма уна чой-вок пиын да уна жö челядь вöлöма и аслас. Челядьдырйиыс висьлöма писькиöн, мый вöсна кольöмаöсь абу сöмын пасъяс, но и нимтöм - Сера Егор. Педот Парась гöтырыс кувлöма водз. Кольöмаöсь Епим Егор ки вылö кöкъямыс ныла-пиа. Овлöма ёнджыкасö кыйсьöм помысь. Вöр керкасö лэптывлöма Кенжан ю бокö. Сы бöрын сэнi кыйсис аслас пияныскöд Микита. Oнi кыйсьö Микита Иван Гриша. Пöрысь пöльыслы сиис кывбур Ёгор Микита Иван Олег:
Епим Ёгор, пöрысь пöльöй,
Нэмсö ветлiс Кенжан пöлöн,
Тöвбыдъясöн олiс öткöн,
Доддьöн вайлiс чери-пöтка.
Ме со сылысь чöс туй вежи,
Сылöн ордым вылысь кежи,
Мöдджык чери-пöтка незэв,
Кыя мöдджык чöскöн-езöн.
Но кор вола Кенжан вылö,
Пöрысь пöльлысь ловшы кыла.
Корся сылысь бипур места,
Ассьым биöс сэтчö песта.

   Ёгор йылысь висьтавлöны уна интереснöйтор. Oтчыд казялас, мый сылысь кулöмъяссö кодкö кыйö. Кыйöдас гусясьысьöс, виччысяс, кор сiйö пöрччысяс да келас кулöмъяс дорас, сэсся пуктас кузь киалысь гачсö мыр вылö да кералас посни торпыригöдз. А номйыс! Синнас абу аддзылöма гусясьысьтö. Коркö пуктöма пом пес гусялöмлы. Пескас сюйöма порок. Педьö Петырлöн пачыс сэтшöма шлопкöма, мый чунавлöма пельыс став гортсалöн.
   Сiдзсö Ёгор вöлöма зэв шань. Гражданскöй война дырйи казялöма еджыдъяслысь воöмнысö, тэрмасьöмöн локтöма сиктö. Пышйöй пö, кодi кытчö верманныд, локтöны еджыдъяс. Бöрынджык Ёгорöс доръяс сiйö, мый гöтырыс Изьваса: öти изьватас салдат тшöктас пырысь-пыр жö бöр кайны аслас Кенжанö.

МЫЖТÖМ МЫЖАЯС.
   Гижышта Карп Илья семья йылысь. Сылöн вöлöма öкмыс ныла-пиа, накöд жö олöма Карп пöльныс да Матрен обныс. Вöлöма и кага видзысь. Ыджыд семьялöн вöлöма уна видз-му да скöт. Колхозъяс котыртан кадö петкöдöмаöсь картасьыныс кöкъямыс мöска-куканя, му кольöмаöсь сöмын öшинь улас. Чöс туйяс абу вöрзьöдöмаöсь, мед сэнi вермисны кыйсьыны. Епим пиыс веськалöма еджыдъяслöн армияö, сэтысь мойвиöма пышйыны Будёный дорö. Ветлöма и Великöй Отечественнöй война вылö. Водз кулöма сьöлöм висьöмысь.
   Вит ныла-пиаыс сэтшöм жö уджачöсь да зiльöсь, кутшöмöсь вöлiны Епим гозъя. Ольга петiс верöс сайö Расыбö кулакавтöдз на. Кулiс кага вайигöн. Марья чужтывлiс дас кык кагаöс, витыс быдмисны. «НАТИ» (вöлi татшöм трактор - Е.Б.) мында вын вöлi да лоö кувны тшыгла», - жалитлöма асьсö. Марьялöн кык внук - наукаясса кандидатъяс. Став семьянас репрессируйтiсны Маринöс. Степанöс ыстiсны вöр кылöдны Печора вылö да эз и волы, сэсянь мунiс война вылö. 1942-öд воын вошис Ленинград дорын. Василий мунiс война вылö Мылдiнсянь, кытчö ыстылiсны лэдзны вöр. Ранаясысь кулiс 1945-öд воын. Дзебисны Польшаын. Наталья уджалiс вöрын, сэсся «Вöр фронт» колхозын, совхозын, пенсия вылö петiс 65 арöсöн.
   «Парма гор» газетысь лыдди Полина Алексеевна Уляшевалысь «Мыжтöм мыжаяс» гижöд, кодлöн подулын Илья Натальлöн висьталöмъяс. Карп Ильялысь семьясö вöтлöмаöсь керкасьыс, сэтчö лöсьöдöмаöсь репрессируйтöмаясöс видзанiн. Тшыгла да висьöмла ёна кулалöмаöсь. Натальялы мöд уджалыськöд быд лун ковмис новлыны кулöмъяссö шойна вылö. Паладьöс ыстiсны кирпич вöчан заводö, кытысь бöрынджык пышйис Öкуль чойыскöд. Илья Öкуль, менам пöрысь ыджыд мам, заводысь пышйöм бöрын пырис колхозö. Уджалiс скöт дорын. Бур уджысь пасйисны «За доблестный труд в Великой Отечественной войне 1941-1945 г. г.» медальöн.    Татшöм жö медаль эм и менам пöрысь пöчлöн, Анна Дмитриевна Уляшевалöн. Егор Микита верöсыскöд сiйö быдтiс квайт ныла-пиаöс. Светлана вöлi Вöльдiн сиктсöвет улын медбур ветеринарöн. Иванöс би кусöдiгöн повтöмлунысь пасйисны куим орден-медальöн. Раиса социальнöя страхуйтöм кузя отличник. Зэв зiльöсь и мукöд ныла-пиа.

БИ ПЫР И ВА ПЫР.
   Паськыд вужйысь унаöн ветлiсны война вылö. Пасйышта пöрысь ыджыд бать да пöрысь пöль йылысь. Никита Егорович Уляшев война вылын вöлöма сапёрöн. Висьтавлiс, мый водзö мунiгöн сапёръяс век вöлiны медводзын, вöчисны посъяс, лöсьöдiсны туйяс, а бöрыньтчигöн - медбöрын, бöр жуглiсны посъяс, взрывайтiсны кöрт туйяс. Усьны вöлi зэв кокни, но Микитаöс пуля эз вöрзьöд. Гортас бергöдчис инвалидöн: кынмалöмысь висьöма золотухаöн. Веськöдлiс Вöльдiнса сельпоöн, уджалiс ветсанитарöн, а сiдзжö пилорама вылын да заправитчанiнын.
   Евлогий Илларионович Уляшев война вылö мунлöма 1941-öд воын, воюйтöма Юго-Западнöй фронт вылын 605-öд стрелкöвöй полкын. Пöгибнитöма стöч во тыран лунö. Дзебöмаöсь Воронеж обласьтса Подгорнöй сиктын.

ЕНБИА  ЛОВ.
   Аркадий Пантелеймонович Калимов - менам ыджыд батьлы воча вок. Чужис 1940-öд вося июль 21 лунö Вöльдiнын. Бать-мамыслöн вöлi витöдöн. Челядьдырыс колис сьöкыда, сёян эз вöв. Казьтылiс, мый корсявлiсны му вылысь арнас колялöм картупель, гожöмнас чукöртiсны быдсяма турун. Мед мездыны тшыгъялöмысь, сизим арöсöн мамыс пуксьöдiс даддьö да мöдöдчис Ухтадорса Асфальтитöвöй рудник посёлокö ылi рöдвуж ордö. Мамыс бöр мунiс, а Аркадийöс босьтiсны пи пыдди. Асфальтитöвöй рудник посёлок пырис «Ухтижемлагö». Сэнi пукалысьяс перйисны сук нефть сора руда - асфальтит. Тайö посёлокас и чуйдiсны А.Калимовöс музыкаö. Квайтöд классын мукöд велöдчысьяскöд нулiсны Ухтаса культура керкаö спектакль вылö. Сэксянь Аркадий кутiс мöвпавны театр йылысь. Дас арöсöн Аркадийлы ньöбисны гудöк. Сэсянь кутiс ворсны клубын, школаын. Школа помалöм бöрын пырис велöдчыны Сыктывкарса музыкальнöй училищеö. Бöрынджык комын во уджалiс культуралöн да искусстволöн учреждениеясын, уна во - республикаса филармонияын. Гижис и кывбуръяс. Культураын да искусствоын уна во бура уджалöмысь сiйöс пасйöма республикаса почёт грамотаясöн, сылы вичмис Россия Федерацияса культура министерствосянь аттьöалöм.
ÖТИ ВУЖЙЫСЬ ВИТ УЧЁНOЙ
   Вужным нималö велöдчöм йöзöн. Петiс вит учёнöй, витнанныс наукаясса кандидатъяс. Вячеслав Тимофеевич Уляшев - физик-математик. Велöдiс СГУ воссьöмсянь. Физик-математик жö Анатолий Михайлович Уляшев. Иван Николаевич Пашнин - историк. Кык вок - Олег Иванович да Игорь Иванович Уляшевъяс -филологъяс. Олег Иванович уджалö Коми научнöй шöринлöн кыв да литература институтын старшöй научнöй сотрудникöн, чукöртö фольклор. Кытшлалö оз сöмын республикаöд, но и Сибирöд, Уралöд, ёнджыкаса уджалö Финляндияын. Государственнöй премияа куимысь лауреат. Гижö научнöй уджъяс, пьесаяс, кывбуръяс, висьтъяс. Дасьтö докторскöй диссертация.
   Уна нималана йöз петiсны миян вужйысь. Зэв пыдди пуктанаöн вöлi менам ыджыд мамöй, Микита Светлана, помавлiс ветеринарнöй техникум да нэмсö уджалiс скöт дорын, дыр кад вöлi сиктсöветын секретарöн. Пенсия вылö петöм бöрын ёна на отсасис йöзлы, лун и вой, рыт и асыв котöртлiс висьысь скöт дорö. Ачыс тшöтш жö кувтöдзыс видзис гид тыр скöт. Ыджыд мам нёль во нин куйлö кыз му улын, но йöзыс век казьтылöны сiйöс бур кывйöн. Ыджыд батьöй уджавлiс трактористöн, сетлiсны «Ветеран труда» медаль. Мамöй кызь во нин уджалö культура керкаса директорöн. Гажöдö йöзöс, быд субöта вöчö том йöзлы йöктан рытъяс. Нуöдö посни челядьлы быдсяма кружокъяс. Нöшта менам эм Николай вок. Oнi сiйö армияын. Ме зэв ёна пыдди пукта да радейта ассьым семьяöс. Меным зэв долыд да шоныд овны накöд. Ме пыдди пукта ас вужйöс да нимкодяся, мый сэнi сы мында бур йöз.
Екатерина БЕЛЯЕВА.
Вöльдiн.
Парма гор
05.08.2008

0

Создать форум

Вы здесь » Бадьёльйывсаяс - Бадьёльские » Вöльдiн - Вольдино » Вольдино. Вычегда


Создать форум